ხვალიდან, 11 მარტიდან სამების საკათედრო ტაძარში სპეციალური პარაკლისები ჩატარდება. ამის შესახებ სრულიად საქართველოს კათალიკოს-პატრიარქმა ილია მეორემ დღევანდელი საკვირაო ქადაგებისას ბრძანა. როგორც უწმინდესმა აღნიშნა, ქართველმა ერმა ლოცვა უნდა გააძლიეროს, სწორედ ამიტომ მიიღო წმინდა სინოდმა ეს გადაწყვეტილება.
როგორც ილია მეორემ სამების საკათედრო ტაძარში ბრძანა ყოველ ორშაბათს აღევლინება წმინდა სამების პარაკლისი საქართველოს კეთილდღეობისა და გადარჩენისთვის. როგორც უწმინდესმა ბრძანა, ეცდება ამ პარაკლისზე აუცილებლად თავად დაესწროს ხოლმე.სამშაბათს აღევლინება წმინდა სამების პარაკლისი ბავშვებისთვის. უწმინდესმა მრევლს მოუწოდა ამ დღეს ბავშვები ტაძრებში მიიყვანონ და სასულიერო პირებს დაალოცინონ. ყოველ ოთხშაბათს კი იქნება ჯვრის პარაკლისი და ამ დღეს სასულიერო პირები ავადმყოფებისთვის ილოცებენ. ყოველ ხუთშაბათს ჩატარდება ღვთისმშობლის პარაკლისი ეკლესიის კეთილდღეობისა და ერის მშვიდობისთვის, ხოლო ყოველ პარასკევს ყოველთა წმიდათა პარაკლისი ერის, ეკლესიისა და ქვეყნის კეთილდღეობისთვის.ყოველ შაბათს იქნება დიდი პანაშვიდი მიცვალებულთათვის. ხოლო ყოველ კვირა დღეს აღევლინება წმინდა სამების პარაკლისი მსოფლიოსთვის და ამ დღეს ქართველი სასულიერო პირები მსოფლიოში მშვიდობისა და კეთილდღეობისთვის ილოცებენ.
სპეციალური პარაკლისები ყოველდღიურად, საღამოს 19:00 საათზე დაიწყება.