ეკონომიკისა და მდგრადი განვითარების მინისტრი გიორგი კვირიკაშვილი უნგრული ავიაკომპანია WIZZ AIR-ის გენერალურ დირექტორს ჯოზაფ ვარადის შეხვდა. შეხვედრაზე, რომელსაც სამინისტროს და კომპანიის სხვა ხელმძღვანელი პირებიც დაესწრნენ, საუბარი ქართულ მხარესა და კომპანიას შორის თანამშრომლობის გაღრმავებისა და სამომავლო პერსპექტივებს შეეხო. ქუთაისის დავით აღმაშენებლის სახელობის საერთაშორისო აეროპორტის მთავარ პრიორიტეტს წარმოადგენს დაბალტარიფებიანი ავიაკომპანიების მოზიდვა და კონკურენტული გარემოს შექმნა როგორც ავიაკომპანიებს, ისე აეროპორტებს შორის. წარმატებული თანამშრომლობის შედეგად ცენტრალური და აღმოსავლეთ ევროპის უმსხვილესმა დაბალბიუჯეტიანმა ავიაკომპანია "WIZZ AIR"-მა გააფართოვა ქსელი ქუთაისის საერთაშორისო აეროპორტიდან. უახლოეს მომავალში გაზრდილი ავიარეისებით ავიაკომპანია შეასრულებს ფრენებს ვარშავის, კიევის, დონეცკის, ხარკოვის და კატოვიცეს მიმართულებით. კიდევ ერთი დამატებითი რეისი კატოვიცეს მიმართულებით წარმოადგენს საქართველოსა და ავიაკომპანია "WIZZ AIR"-ის მხრიდან მორიგ წინგადადგმულ ნაბიჯს, რაც თავის მხრივ ხელს შეუწყობს საქართველოს ინტეგრაციის პროცესს ევროპასთან და მნიშვნელოვან როლს ითამაშებს როგორც ეკონომიკური ზრდის, ისე ტურიზმის განვითარების სფეროში. როგორც შეხვედრის მონაწილეებმა აღნიშნეს, ბილეთის დაბალტარიფიანი ღირებულებიდან გამომდინარე, პერმანენტულად იზრდება მგზავრთა რაოდენობა, რამაც განაპირობა ავიაკომპანია "WIZZ AIR"-თან თანამშრომლობის ახალ ეტაპზე გადასვლა. ამასთან, მინისტრის ინფორმაციით, კომპანიამ ქართულ მხარეს წინადადებით მიმართა ქუთაისის აეროპორტში მომსახურების ბაზის გახსნის თაობაზე, რაც მათ სამხრეთ-აღმოსავლეთის მიმართულებით ფრენების გაფართოების საშუალებას მისცემთ. „ჩვენ ძალიან ინტენსიურად ვმუშაობთ საქართველოში შიდა ფრენების გაფართოების მიმართულებითაც. ვფიქრობ, ეს ძალიან მნიშვნელოვანი იქნება ადგილობრივი და რეგიონალური ბიზნესისა და ტურიზმის განვითარების კუთხით, რათა ყველა სეგმენტის ტურისტმა და საქმიანმა ადამიანმა შეძლოს მოგზაურობა და კავშირების დამყარება არამარტო თბილისში, არამედ საქართველოს სხვა ქალაქებშიც" - აღნიშნა ეკონომიკისა და მდგრადი განვითარების მინისტრმა.
