„ლიბერთი ბანკი" და „თიბისი ბანკი" საქართველოს პრეზიდენტს ტყუილში ადანაშაულებენ. როგორც „ლიბერთი ბანკის" სამეთვალყურეო საბჭოს თავმჯდომარემ ლადო გურგენიძემ Facebook-ის საშუალებით განაცხადა, პრეზიდენტის განცხადება, თითქოს „ლიბერთი ბანკი" „სბერბანკმა" იყიდა სიმართლეს არ შეესაბამება.
„ძვირფასო მეგობრებო, ახლახანს ტელევიზიით გაჟღერდა ინფორმაცია, თითქოს „ლიბერთი ბანკი" რუსულმა "სბერბანკმა" იყიდა. მინდა გაცნობოთ, რომ აღნიშნული ინფორმაცია სიმართლეს არ შეესაბამება. ჩვენ "სბერბანკთან" „ლიბერთი ბანკის" გაყიდვაზე არანაირ მოლაპარაკებას არ ვაწარმოებთ. "ლიბერთი ბანკს" წელს საკმაოდ ამბიციური გეგმები გააჩნია ქსელის შემდგომი განვითარებისა და მომსახურების დახვეწის კუთხით, და თანმიმდევრულად ვახორციელებთ ჩვენს გეგმებს"- აცხადებს ლადო გურგენიძე
რაც შეეხება „თიბისი ბანკის", ბანკის მენეჯმენტი განმარტავს, რომ მოლაპარაკებებს „ალფა ბანკთან" არ აწარმოებს.
„საქართველოს პრეზიდენტმა ახლახან, მის სატელევიზიო გამოსვლაში აღნიშნა, რომ თითქოსდა თიბისი ბანკი შეიძინა რუსეთის ერთ-ერთმა უმსხვილესმა ბანკმა - ალფა ბანკმა.
გვინდა ოფიციალურად განვაცხადოთ, რომ თიბისი ბანკი არ აწარმოებს და არც უახლოეს მომავალში გეგმავს მოლაპარაკებას წილის გასხვისების თაობაზე ალფა ბანკთან, თუ ნებისმიერ სხვა უცხოურ ბანკთან"- ნათქვამია „თიბისი ბანკის" განცხადებაში.
საქართველოს პრეზიდენტი ქართულ საბანკო სივრცეში რუსული კაპიტალის შემოდინებაზე ალაპარაკდა. როგორც მიხეილ სააკაშვილმა ჟურნალისტებთან საუბრისას განაცხადა, უკვე მიღწეულია შეთანხმება და „ლიბერთი ბანკი" რუსული „სბერბანკის" საკუთრება ხდება.
„რუსეთის ერთ-ერთი ყველაზე დიდი ბანკი „ალფა ბანკი", რომელიც მჭიდროდაა დაკავშირებული კრემლთან „თიბისი ბანკს" ყიდულობს. „ქართუ" ისედაც რუსული ბანკია, საქართველოში შემოდის „გაზპრომ ბანკი", რომელსაც რამდენიმე ქართული ბანკის ყიდვა სურს. უნდა გვესმოდეს, რომ ქართველების 60-70 %-ი ამ ბანკებშია ჩადებული, კრედიტებით, იპოთეკით და ასე შემდეგ. საქართველოს მთავრობა აცხადებს, რომ ეკონომიკა წავა ქვემოთ. თუ ზრდა არ მოხდება, დიდი ალბათობით ვიღაცა კრედიტს ვერ გადაიხდის და ბანკები ამ ქონებას წაიღებენ", - განაცხადა სააკაშვილმა.
პრეზიდენტის განმარტებით, ანალოგიურ მდგომარეობაში უკვე მოექცა უკრაინული საბანკო სისტემა და უკრაინაში კაპიტალის 70 %-ს რუსეთის ხელთაა, რის გამოც ევროპას უკრაინაზე „ცივი რექაცია აქვს".