აშშ საქართველოს რეფორმების განხორციელებაში დაეხმარება. ვაშინგტონის გადაწყვეტილებაზე ეკონომიკისა და მდგრადი განვითარების სამინისტროში შეხვედრაზე ამერიკის ელჩმა, რიჩარდ ნორლანდმა ისაუბრა. გიორგი კვირიკაშვილთან შეხვედრაზე ის პრიორიტეტული საკითხები განიხილეს, რომლებზეც შეერთებული შტატები ამ ეტაპზე საქართველოსთან თანამშრომლობს - საუბარია საკუთრების უფლების დაცვის სფეროზე, კონკურენტული ბიზნესგარემოს ჩამოყალიბებასა და შრომის კოდექსის დახვეწაზე. ელჩის განცხადებით, განისაზღვრა პრიორიტეტები, რაც პირველ რიგში საკუთრების უფლებების დაცვას ეხება. ,,ვისაუბრეთ საქართველოში ინვესტიციებზე, ეკონომიკურ განვითარებასა და ეკონომიკურ ზრდაზე. შეერთებული შტატები საელჩოსა და სხვადასხვა პროგრამებისა და უწყებების საშუალებით მჭიდროდ თანამშრომლობს ეკონომიკისა და მდგრადი განვითარების სამინისტროსთან. ჩვენ დაინტერესებულნი ვართ გაღრმავდეს ჩვენი დიალოგი თავისუფალ ვაჭრობასთან დაკავშირებით. ვფიქრობ, ეს თანამშრომლობა სამომავლოდ კიდევ უფრო გაფართოვდება,-‘'განაცხადა რიჩარდ ნორლანდმა.
ეკონომიკისა და მდგრადი განვითარების მინისტრის განცხადებით, ქართული მხარე მზად არის კიდევ უფრო გააღრმავოს თანამრომლობა კანონმდებლობის დახვეწის კუთხით, ასევე უნდა გაღრმავდეს დიალოგი თავისუფალ ვაჭრობასთან და საქართველოში საინვესტიციო გარემოს გაუმჯობესებასთან დაკავშირებით.
,,ჩვენ ძალიან ბევრი მიმართულებით ვთანამშრომლობთ. ძირითადი განხილვის თემა იყო, ის გამოუყენებელი პოტენციალი, რომელიც ჩვენს ქვეყნებს შორის არსებობს. ვფიქრობთ, რომ ამ მიმართულებით გაცილებით უფრო აქტიური მუშაობა არის საჭირო. რადგან იმ სტრატეგიული პარტნიორობის ფარგლებში, რომელიც საქართველოს შეერთებულ შტატებთან აქვს გაცილებით უფრო მეტი ეკონომიკური შედეგია მისაღები,-‘'განაცხადა გიორგი კვირიკაშვილმა.