შინაგან საქმეთა მინისტრი ირაკლი ღარიბაშვილი შსს-ს აკადემიაში გამართულ პოლიციელების ტესტირებას დაესწრო. მინისტრი ტესტირებაში მონაწილე პირებს გაესაუბრა და მიმდინარე პროცესი შეაფასა. ტესტირება, რომელშიც მთელი საქართველოს მასშტაბით ათი ათასამდე პოლიციელი იღებს მონაწილეობას, პირველად ტარდება.
მისი მიზანია სამართალდამცველების პროფესიული უნარების შეფასება და მაღალკვალიფიციური კადრის გამოვლენა. ნაკლებად დამაკმაყოფილებელი შეფასების მქონე პირები შესაბამის გადამზადების კურსებს გაივლიან. ტესტირების პროცესში, სტრატეგიული პარტნიორი ქვეყნების ექსპერტებთან ერთად მოხდება პოლიციელთა კვალიფიკაციის ამაღლების კურსების განსაზღვრა;
კითხვარები ტესტირებაში მონაწილე პირების პროფესიული საქმიანობიდან გამომდინარეა შედგენილი. თითოეულმა მონაწილემ 2 საათსა და 30 წუთში 100 კითხვას უნდა უპასუხოს. ტესტირებას გაივლიან როგორც მაღალი თანამდებობის პირები- სამმართველოების უფროსები და მათი მოადგილეები, ასევე - უბნის ინსპექტორები, დეტექტივ- გამომძიებლები, დეტექტივ-თანაშემწეები, საპატრულო და სასაზღვრო პოლიციის თანამშრომლები; აგრეთვე მონაწილეობას მიიღებს პოლიციის ყველა ის დანაყოფი, რომელიც ოპერატიულ ფუნქციას ასრულებს.
შინაგან საქმეთა სამინისტროს სრული შემადგენლობის ტესტირება ორი დღის განმავლობაში, საქართველოს ყველა რეგიონში გაგრძელდება.