ფინანსთა მინისტრი ნოდარ ხადური „დაბი ჯგუფის" წარმომადგენლებს შეხვდა. შეხვედრაზე, განიხილეს მათ მიერ საქართველოში განხორციელებული პროექტების მდგომარეობა, ასევე სამომავლო საინვესტიციო პროექტები.
შეხვედრაზე ინვესტორების მხრიდან გამოითქვა მზადყოფნა ქვეყანაში გაზარდონ ინვესტიციების მოცულობა. მათი განცხადებით, საქართველო ახლა სწორი მიმართულებით ვითარდება და სწორედ ქვეყანაში შექმნილი ხელსაყრელი საინვესტიციო გარემო გახდა მიზეზი იმისა, რომ „დაბი ჯგუფი" მარტის შუა რიცხვებიდან დამატებით ერთი მილიარდი დოლარის ოდენობის ინვესტიციას განახორციელებს.
„დაბი ჯგუფისა" და ზოგადად, ინვესტორებისთვის მნიშვნელოვანია საქართველოს მთავრობის მხრიდან დადასტურება იმისა, რომ პოლიტიკა იქნება სტაბილური, არ გაიზრდება გადასახადები, ქვეყანაში დაცული იქნება ინვესტორების უფლებები. საქართველოს მთავრობის პოზიცია ინვესტორებთან მიმართებაში ცნობილია და ის პრემიერ-მინისტრმა არაერთხელ დააფიქსირა - ქვეყანაში ყველა ინვესტორის ინტერესი და საკუთრება იქნება დაცული, რომ საქართველოში შეიქმნება საუკეთესო ბიზნესგარემო და ქვეყანა გააგრძელებს კურსს იმისთვის, რათა ბიზნესის მეშვეობით საქართველო წარმატებული ქვეყანა გახდეს," - განაცხადა ფინანსთა მინისტრმა.
„დაბი ჯგუფი" საქართველოში ამჟამად 180 მილიონი დოლარის ოდენობის ინვესტიციას ახორციელებს. ფინანსთა მინისტრს გავაცანით ჩვენი საქმიანობა და ის უახლოესი საინვესტიციო პროექტები, რომელსაც „დაბი ჯგუფი" ახორციელებს მთელ მსოფლიოში. გვსურს ჩვენი თანამშრომლობა საქართველოსთან უფრო გააქტიურდეს. დაგეგმილია, რომ „დაბი ჯგუფი" გაზაფხულიდან დამატებით, კიდევ ერთი მილიარდი დოლარის ინვესტიციების განხორციელებას დაიწყებს," - განაცხადა - „დაბი ჯგუფი საქართველოს" მრჩეველმა ფადი ასლიმ.
ჯგუფი ამჟამად ინვესტიციებს ახორციელებს საბანკო და ტურისტულ სექტორებში, სასტუმროების მშენებლობასა და ტელეკომუნიკაციებში.
