ფინანსთა მინისტრი ნოდარ ხადური ინდური ტრანსნაციონალური კომპანია „ტატა გრუპის" დელეგაციას შეხვდა, რომელიც თავის მხრივ საქართველოში საინვესტიციო გარემოს გასაცნობად ჩამოციდა და შეხვედრებს მართავს მთავრობისა და კერძო სექტორის წარმომადგენლებთან.
შეხვედრაზე ფინანსთა მინისტრმა სტუმრებს გააცნო სამინისტროში მიმდინარე რეფორმები, საგადასახადო და საბაჟო კანონმდებლობა, ის ნაბიჯები, რომელსაც მთავრობა დგამს ინვესტორების საქმიანობის ხელშეწყობისა და წახალისებისთვის.
შეხვედრისას, განიხილეს ის სფეროები, სადაც ინდური მხარე დაინტერესებულია ინვესტირებით - სოფლის მეურნეობა, ენერგეტიკა, ტურიზმი, გადამამუშავებელი მრეწველობა, საინფორმაციო ტექნოლოგიები.
„დღეს მივიღე შეკითხვები, რომლებიც ადასტურებს, რომ კომპანიის მხრიდან დაინტერესება არის ძალიან მაღალი. მათ აინტერესებთ ქვეყნის საინვესტიციო გარემო, საგადასახადო კანონმდებლობა, რეფორმები საჯარო ფინანსების სფეროში, საბანკო სექტორში არსებული მდგომარეობა და სხვა. აღნიშნული კომპანია სერიოზულადაა დაინტერესებული საქართველოს ენერგოსექტორით, ამ სფეროში სახელმწიფოს მიერ გამოყოფილი ინვესტიციებით. მათთვის მნიშვნელოვანი იყო იმის გაგება, რომ საქართველოს ახალი მთავრობა არ აპირებს გადასახადების გაზრდას და გეგმავს ინვესტორებისთვის სტაბილური საინვესტიციო გარემოს შექმნას," - განაცხადა ფინანსთა მინისტრმა შეხვედრის დასრულების შემდეგ.
შეხვედრაზე ასევე ისაუბრეს ქვეყანაში არსებულ ეკონომიკურ მდგომარეობასა ორმხრივი თანამშრომლობის საკითხებზე.
დღესვე „ტატა ჯგუფის" წარმომადგენლები პრემიერ-მინისტრმა ბიძინა ივანიშვილმა მიიღო.
პირველი შეხვედრა საქართველოს პრემიერ-მინისტრსა და ინდურ კომპანიას შორის დავოსში, მსოფლიო ეკონომიკური ფორუმის ფარგლებში გაიმართა, სადაც „ტატა ჯგუფმა" საქართველოში ინვესტიციების განხორციელების სურვილი გამოთქვა.
შეხვედრაზე საუბარი ქართულ მხარესა და კომპანიას შორის სამომავლო თანამშრომლობის პერსპექტივებს შეეხო. „ტატა ჯგუფი" დაინტერესებულია საინვესტიციო პროექტების განხორციელებით რამდენიმე სფეროში: ენერგეტიკა, ტურიზმი, სოფლის მეურნეობა, გადამამუშავებელი მრეწველობა, საინფორმაციო ტექნოლოგიები.
„ტატა ჯგუფი" მსოფლიოს 50 წამყვან კორპორაციათა სიაში შედის, მას მსოფლიოს 80-ზე მეტ ქვეყანაში აქვს წარმომადგენლობა. იგი მოიცავს 114 კომპანიას, რომლებიც ბიზნესის 8 სექტორის მიმართულებით მუშაობენ.
