სომხეთის დღევანდელი პრეზიდენტის მთვარი კონკურენტი, სერჟ სარგისიანის გამარჯვების ცნობაზე უარს ამბობს. რაფი ოვანესიანი, რომელმაც უკანასკნელი მონაცემებით 36,75 პროცენტი აიღო, სარქისიანს დამარცხების აღიარებას სთავაზობს და აცხადებს, რომ ის სომხეთის არჩეული პრეზიდენტია.
სარგისიანმა ხმათა 58,64 პროცენტი მიიღო. ამან კი მის პირველივე ტურში გამარჯვება განაპირობა. მოქმედმა პრეზიდენტმა თავის გუნდს მადლობა გადაუხადა და იმედი გამოთქვა, რომ ისინი, ვინც მას მხარი არ დაუჭირეს, პატივს სცემენ უმრავლესობის გადაწყვეტილებას. თუმცა, ოპონენტი რაფი ოვანესიანი სარქისიანის გამარჯვების აღიარებაზე უარს აცხადებს.
საერთაშორისო დამკვირვებლებმა სომხეთის არჩევნები პოზიტიურად შეაფასეს და აღნიშნეს, რომ ზოგიერთი დარღვევის მიუხედავად, პროცესმა ნორმალურად ჩაიარა, თუმცა, ოპოზიცია ამ დასკვნას არ ეთანხმება.
ხუთი წლის წინაც ოპოზიციამ არ ცნო საპრეზიდენტო არჩევნების შედეგები, რომლის გამარჯვებულიც სერჟ სარქისიანი გახდა. მასობრივმა საპროტესტო აქციებმა დაახლოებით ორი კვირა გასტანა, საბოლოოდ კი, აქციები ხელისუფლებამ დაარბია. სისხლიანი შეტაკების დროს, სამართალდამცავებსა და დემონსტრანტებს შორის, ათი ადამიანი დაიღუპა.
ამჟამად, მიუხედავად იმისა, რომ ხმის მიცემა მშვიდად წარიმართა, ესკალაციის საფრთხე მაინც არსებობს. ოვანესიანის მხარდამჭერები უკვე შეიკრიბნენ ლოზუნგებით: „რაფი პრეზიდენტია" და ისინი შემდეგი დღეების განმავლობაშიც არ აპირებენ დაშლას, მაგრამ ექსპერტები მაინც ვარაუდობენ, რომ ხუთი წლის წინანდელი მოვლენების მსგავსი სცენარი აღარ გამეორდება.
სარგისიანის არჩევა მეორე საპრეზიდენტო ვადით ნიშნავს იმას, რომ ქვეყნის პოლიტიკური კურსი არ შეიცვლება, თუმცა, სპეციალისტების ვარაუდით, სარქისიანი ქვეყნის შიგნით უფრო თამამი ნაბიჯების გადადგმას შეეცდება.
