მთავრობა ბიზნესს სასტუმროთა ასოციაციის შექმნას სთავაზობს. როგორც სააგენტო „ჯი-ეიჩ-ენთან" საუბრისას ეკონომიკისა და მდგრადი განვითარების მინისტრის პირველმა მოადგილემ დიმიტრი ქუმსიშვილმა განაცხადა, სახელმწიფო და ზოგადადა ეკონომიკის სამინისტრო ცალკეულ სასტუმროებთან ურთიერთობას და მათი პრობლემების გადაწყვეტას ვერ მოახდენს. ამისათვის კი საჭიროა შეიქმნას სპეციალიზირებული გაერთიანება, რომელიც სასტუმროების პრობლემებს მთავრობის წინაშე დააყენებს.
„დღემდე ალბათ კონსოლიდირებულნი არ იყვნენ და ამის საჭიროებას ვერ ხედავდნენ. თუმცა ახლა ჩვენ ვეუბნებით, რომ ვერანაირად ვერ მოვახერხებთ ცალკეულ სასტუმროებთან ურთიერთობას, ამიტომ საჭიროა ასოციაციის შექმნა, რომელიც ამ სასტუმროების ინტერესს გამოხატავს"- განუცხადა სააგენტო „ჯი-ეიჩ-ენს" დიმიტრი ქუმსიშვილმა.
აღსანიშნავია, რომ მას შემდეგ რაც სასტუმროთა გაერთიანება შეიქმნება, ის ახლად შექმნილ ტურიზმის მრჩეველთა საბჭოშიც წევრიც გახდება და სახელმწიფოსთან ერთად დარგში არსებული სხვადასხვა პრობლემების მოგვარებაზე და საკანონმდებლო ინიციატივებზე იმუშავებს.
