ის ფონდები, რომელიც უახლოეს პერიოდში ამუშავდება, საპარტნიორო ფონდის ხელმძღვანელის განმარტებით, მნიშვნელოვანი სტიმული იქნება საინვესტიციო კლიმატის გასაუმჯობესებლად. ირაკლი კოვზანაძის თქმით, ფონდები დაახლოებით 2 თვეში ამუშავდება.
„ფონდებთან დაკავშირებით, როგორც პრემიერმა განაცხადა, მუშაობა მიმდინარეობს. გარკვეული პერიოდის შემდეგ, 1,5-2 თვის შემდგომ ფონდი უკვე ჩამოყალიბებული იქნება და მუშაობას შეუდგება.
პირველი ეს გახლავთ თანაინვესტირების ფონდი: ეს იქნება კერძო ინვესტიციების ფონდი. ჩვენ ვფიქრობთ, რომ ჰორიზონტი ამ ფინანსირების იქნება დაახლოებით 8 წლამდე. ფონდი განიხილავს აბსოლუტურად ყველა პროექტს, რომელიც იქნება კომერციულად მომგებიანი და ქვეყნისთვის საჭირო.
მეორე ფონდი - ეს არის სუვერენული ფონდი, რომელიც საპარტნიორო ფონდის ბაზაზე შეიქმნება და გარკვეული კატეგორიის სუვერენული აქტივები გადაეცემა ამ ფონდს. აქვე შეიქმნება ასევე სტრატეგიული განვითარების ფონდი, რომელიც დააფინანსებს სახელმწიფოსათვის მნიშვნელოვან პროექტებს, რომელიც არის პრიორიტეტი საქართველოსათვის.
გარდა ამისა სუვერენული ფონდის ქოლგის ქვეშ შეიქმნება ინოვაციური ფონდი დააფინანსებს ყოველგვარ ინოვაციას. ამ ფონდებზე მუშაობა მიმდინარეობს და ეს იქნება მნიშვნელოვანი სტიმული საინვესტიციო კლიმატის გასაუმჯობესებლად"- აცხადებს ირაკლი კოვზანაძე.
