ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა დავით დარახველიძემ და მინისტრის მოადგილემ ნინო ჭავჭავაძემ მსოფლიო ბანკის ვაშინგტონის ოფისის წარმომადგენელთან ჯოანა ფის დე ბერთან და დელეგაციის სხვა წევრებთან ოფიციალური შეხვედრა გამართეს.
მინისტრმა დელეგაციას მადლობა გადაუხადა სტუმრობისთვის და იძულებით გადაადგილებულ პირთა ზოგადი მდგომარეობა გააცნო. დავით დარახველიძემ დევნილი მოსახლეობის მთავარ პრობლემად განსახლება დაასახელა. მინისტრის თქმით, რეგისტრირებული 90 000 დევნილი ოჯახიდან საცხოვრებელი ფართობით დაკმაყოფილებულია მხოლოდ 25 000 ოჯახი, დანარჩენი 65 000 ოჯახი კი ჯერ კიდევ მოლოდინის რეჟიმშია. მინისტრის თქმით, 65 000-დან 40 000-სს საცხოვრებელი ფართის გადაუდებელი საჭიროება აქვს.
საუბარი ასევე შეეხო სამინისტროს ახალ სტრატეგიას, რომელიც ოთხი წლის განმავლობაში დევნილთა სრულ განსახლებას ითვალისწინებს. მინისტრის თქმით, ეს საკმაოდ რთული პროცესია და აღნიშნა, რომ დონორი ორგანიზაციების მხარდაჭერა აუცილებელია.
მსოფლიო ბანკის წარმომადგენლებმა მინისტრს მადლობა გადაუხადეს გულახდილი საუბრისათვის და აღნიშნეს, რომ მათთვის მთავარია, მოისმინონ სამინისტროს პრიორიტეტები და მასზე დაყრდნობით იმოქმედონ. მათ, ასევე, მოიწონეს სამინისტროს მიერ შემუშავებული ოთხწლიანი გეგმა და აღნიშნეს, რომ მოხარულნი არიან, როდესაც სამინისტრო ასეთ მზაობას და ნებას გამოხატავს დევნილთა პრობლემების მოგვარებისათვის.
მოწვეულმა სტუმრებმა ასევე აღნიშნეს, რომ აუცილებელია განსახლებასთან ერთად დევნილთა ინტეგრაციას მიექცეს ყურადღება. მათ არნიშნეს, რომ სამინისტროს დევნილთა პრობლემების მოგვარებაში მსოფლიო ბანკის იმედი უნდა ჰქონდეს.
„თანამშრომლობა მსოფლიო ბანკსა და დევნილთა სამინისტროს შორის გაგრძელდება"- აღნიშნა მსოფლიო ბანკის ვაშინგტონის ოფისის წარმომადგენელმა ჯოანა ფის დე ბერმა.
