კერძო სექტორისთვის სტატისტიკური ინფორმაციის გაცემა სავალდებულო გახდება, ამის შესახებ განცხადება ფინანსთა მინისტრმა ნოდარ ხადურმა მრჩეველთა საბჭოსთან გამართული შეხვედრის შემდეგ გააკეთა, რომელიც დღეს სასტუმრო „შერატონ მეტეხი პალასში" გაიმართა.
შეხვედრაზე ფინანსთა მინისტრმა და მრჩეველთა საბჭომ „საქსტატის" ხელმძღვანელს ზაზა ჭელიძეს მოუსმინეს და სტატისტიკის წარმოებაში არსებულ პრობლემებს და მიმდინარე რეფორმებს გაეცნენ.
როგორც ფინანსთა მინისტრი განმარტავს, „საქსტატს" ფინანსურ პრობლემასთან ერთად ინფრასტრუქტურული პრობლემაც გააჩნია და მნიშვნელოვანია, რომ მთელი უწყება ერთ შენობაში იყოს განლაგებული. როგორც ირკვევა მალე „საქსტატი" ადგილმდებარეობას შეიცვალის და სამუშაოდ ისევ თბილისში დაბრუნდება.
„როგორც იცით, ფინანსთა სამინისტროში მრჩეველთა საბჭო შეიქმნა და დღეს მრჩეველთა საბჭოსთან შეხვედრის რიგით მეორე შეხვედრა შედგა. მრჩეველთა საბჭოს ინტერესი იყო, რომ მოგვესმინა ქვეყნის სტატისტიკის შესახებ ინფორმაცია. „საქსტატის" აღმასრულებელი დირექტორისგან მოვისმინეთ დეტალური ინფორმაცია, მიმდინარე პროცესებზე და უწყებაში არსებულ პრობლემაზე.
როგორც ყოველთვის ფინანსთა სამინისტროსთან ყველა პრობლემა დაფინანსებით იწყება. რესურსები სტატისტიკის ეროვნულ სამსახურს, როგორც სჩანს მართლაც შეზღუდული აქვს. როგორც იცით, „საქსტატი" წინა მთავრობამ სამუშაოდ წყნეთში გადაიყვანა, რაც პრობლემებს უქმნის ბიზნესმენებსაც და უბრალო მომხმარებელსაც, რათა სტატისტიკის სამსახურში მივიდეს. „საქსტატის" ნაწილი თბილისშია და ეს გარკვეულ პრობლემებს ქმნის. გარდა ამისა სტატისტიკური ინფორმაციის მიწოდება არ არის სავალდებულო და ეს მხოლოდ ბიზნესმენის კეთილ ნებაზეა დამოკიდებული. ჩვენ ვიხილავთ ამ საკითხებს, როგორც „საქსტატი" ასევე ფინანსთა სამინისტრო, რათა კანონმდებლობაში შევიდეს გარკვეული ცვლილებები"- აცხადებს ნოდარ ხადური.
ქვეყნის მთავარი ფინანსისტი აცხადებს, რომ ბიზნესმენებისათვის სტატისტიკური ინფორმაციის გაცემა სავალდებულო უნდა გახდეს.
„ჩვენ ვსაუბრობთ იმაზე, რომ ბიზნესმენებისათვის სტატისტიკური ინფორმაციის გაცემა გახდეს სავალდებულო. მსოფლიოში არც ერთი ქვეყანა არ არის, სადაც სტატისტიკური ინფორმაციის გაცემა სტატისტიკის მწარმოებელი უწყებისთვის იყოს ნებაყოფლობითი"- აცხადებს ხადური.
„საქსტატის" აღმასრულებელი დირექტორის ზაზა ჭელიძის განმარტებით, უწყებისთვის მთავარ პრობლემად მაინც მოძველებული და დაბალი ხარისხის მონაცემთა ბაზებია.
„ექსპერტებთან შეხვედრისას სტატისტიკაში არსებულ ვითარებაზე ვისაუბრეთ. აუდიტორიას ბოლო წლებში „საქსტატში" განხორციელებული ცვლილებები გავაცანით. ვისაუბრეთ ასევე პრობლემებზე. ძირითადი ჩვენი პრობლემა მონაცემთა წყაროების დაბალი ხარისხია: რაშიც იგულისხმება საკმაოდ მოძველებული მონაცემთა წყაროები ასევე სოფლის მეურნეობის 2002 წლის ბაზები. გარდა ამისა პრობლემატურია სამსახურის მოუწესრიგებელი ინფრასტრუქტურა და ადამიანური რესურსის ნაკლებობა. პრობლემატურია ასევე დაფინანსება და არასაკმარისი კოორდინაცია სტატისტიკის მწარმოებელ სამსახურებს შორის"- აცხადებს ჭელიძე.
მისი განმარტებით, 2013 წლის ბიუჯეტი, უწყებას უკვე დამტკიცებულ ბიუჯეტთან შედარებით, მეტი ქონდა მოთხოვნილი, თუმც უწყებამ შედარებით ნაკლები მიიღო.
„თუმც დაფინანსების საჭიროება მაინც ჩვენი პროდუქციის მოთხოვნაზეა დამოკიდებული. ჩვენი პროდუქტი არის საზოგადოებრივი პროდუქტი და ინფორმაცია ჭირდება ყველას, პირველ რიგში მთავრობას.
კერძო დაკვეთებიც არის, თუმც კერძო სექტორიდან მიღებული შემოსავლები საკმაოდ დაბალია და მსოფლიოში სტატისტიკის უწყება მხოლოდ კერძო დაკვეთებით ვერ ცოცხლობს, რადგან კერძო დაკვეთებიდან შემოსული შემოსავლები საჭირო დაფინასების 5 %-ის ფარგლებშია, თუმცა ჩვენს შემთხვევაში 2012 წელს მხოლოდ 1 %-იანი შემოსავლები გვქონდა"- აცხადებს ზაზა ჭელიძე.
