ფინანსთა სამინისტროს დავების განხილვის საბჭოში გარკვეული რეფორმები მიმდინარეობს. რეფორმების მიმდინარეობის შესახებ პრეზენტაცია დღეს „შერატონ მეტეხი პალასში" გაიმართა, რომელსაც ფინანსთა მინისტრი ნოდარ ხადურიც დაესწრო. შეხვედრის ფარგლებში, დავების განხილვის საბჭოს გამჭირვალობისა და საჯაროობის მიმართულებით ფინანსთა სამინისტროს ახალი ხელმძღვანელობის პოლიტიკის განხილვა მოხდა. განიხილეს ასევე საბჭოს მუშაობაში პრეცედენტული სამართლის პრინციპების დამკვიდრების ინიციატივაც.
დღეს ფინანსთა სამინისტრომ დავების განხილვის საბჭოს 2 ახალი წევრი წარადგინა, რომელიც საბჭოში არასამთავრობო სექტორის კვოტიდან მოხვდნენ. მცირე და საშუალო საწარმოთა ასოციაციის პრეზიდენტი, კახა კოხრეიძე და ეკონომიკური პოლიტიკის ინსტიტუტის აღმასრულებელი დირექტორი გიორგი აბაშიშვილი, ამიერიდან დავების განხილვის საბჭოს მუშაობაში აქტიურად იქნებიან ჩართულნი.
როგორც ცნობილია, საგადასახადო დავების განხილვის საბჭოს მუშაობის გამჭვირვალობისა და აღნიშნულ პროცესში საზოგადოების მეტი ჩართულობის მიზნით ფინანსთა სამინისტროს აბჭოს მუშაობაში არასამთავრობო სექტორის წარმომადგენლების ჩართვის ინიციატივით გასული წლის ბოლოს გამოვიდა. (პროცესში არასამთავრობო ორგანიზაციების უფრო ფართო სპექტრის მონაწილეობის უზრუნველსაყოფად ყოველ ექვს თვეში ერთხელ, წევრები შეიცვლებიან როტაციის პრინციპით)
იმავდროულად, განახლდა დავების განხილვის საბჭოს ოფიციალური ვებ-გვერდი http://www.taxdisputes.gov.ge/ , სადაც ქვეყნდება დავების განხილვის საბჭოს მიერ მიღებული გადაწყვეტილებები (მომჩივანთა მაიდენტიფიცირებელი მონაცემების გარეშე), რომელიც დაეხმარება გადასახადის გადამხდელებს, გაეცნონფინანსთა სამინისტროს მიდგომების და მიღებულ გადაწყვეტილებათა პრეცენდენტულ ხასიათს. უკვე დამკვიდრებული პრაქტიკის შესაბამისად, გადაწყვეტილების მიღებისას მიეთითება გადაწყვეტილება, რომლის ანალოგიითაც გადაწყვიტა საბჭომ საქმე.
