აჭარის ფინანსთა და ეკონომიკის სამინისტროს ირანის ისლამური რესპუბლიკის მერკეზის პროვინციის, ქალაქ არაქის ოფიციალური დელეგაცია სტუმრობდა. აჭარის ფინანსთა და ეკონომიკის სამინისტროს ინფორმაციით, აღნიშნული რეგიონის სავაჭრო-სამრეწველო პალატის, ბიზნეს-წრეების და ირანის ისლამური რესპუბლიკის გენერალური საკონსულოს წარმომადგენლები აჭარის ფინანსთა და ეკონომიკის მინისტრმა გიორგი თავართქილაძემ მიიღო. შეხვედრა გაცნობითი ხასიათის იყო. სტუმრებმა თავიანთი რეგიონის ეკონომიკურ შესაძლებლობებზე ისაუბრეს. მათი თქმით, არაქის რეგიონში 2850 მსხვილი და საშუალო საწარმო მოქმედებს, რომელთა უმრავლესობა ექსპორტს საზღვარგარეთ აწარმოებს. დელეგაციის წევრების მხრიდან გამოითქვა სურვილი აჭარის ავტონომიურ რესპუბლიკასა და არაქს შორის სამომავლოდ ეკონომიკურ სფეროში თანამშრომლობის თაობაზე. შეხვედრისას საუბარი შეეხო ასევე, თავისუფალი ვაჭრობის შესახებ შეთანხმების გაფორმებასა და ორ რეგიონს შორის პირდაპირი ავიარეისების დანიშვნის საკითხსაც. გადაწყდა, რომ უახლოეს პერიოდში ირანის ისლამური რესპუბლიკის ქალაქ არაქს, საპასუხო ვიზიტით, აჭარის ფინანსთა და ეკონომიკის სამინისტროს ხელმძღვანელი პირები ეწვევიან.