როგორც სააგენტო „ჯი-ეიჩ-ენს" აჭარის ფინანსთა და ეკონომიკის სამინისტროში განუმარტეს, ფიზიკურ პირს ზარიფა ჰამზაევას, 211 წელს, პირდაპირი მიყიდვის ფორმით, ბათუმში, შ. ხიმშიაშვილის ქუჩის მიმდებარედ სასტუმრო "მარინასა" და აკვაპარკს შორის მდებარე 9900 კვ/მ. არასასოფლო-სამეურნეო დანიშნულების მიწის ნაკვეთი, პირდაპირი მიყიდვის ფორმით სიმბოლურ ფასად - 1 ლარად გადაეცა. ზარიფა ჰამზაევასა და სამინისტროს შორის გაფორმებული ხელშეკრულების მიხედვით, ინვესტორი ვალდებული იყო, ხელშეკრულების გაფორმებიდან არაუმეტეს 20 თვის ვადაში აღნიშნულ ტერიტორიაზე, არანაკლებ 100 ნომრიანი თანამედროვე სასტუმრო კომპლექსი აეშენებინა, სადაც 100 სამუშაო ადგილი შეიქმნებოდა.
აჭარის ფინანსთა და ეკონომიკის სამინისტროში აცხადებენ, რომ სამინისტროს მხრიდან 2012 წლის ოქტომბერში ზარიფა ჰამზაევას მიეცა თანხმობა ხელშეკრულებით ნაკისრი ვალდებულებები და უფლებები შპს „ეს დაბლიუ-ინნ"-თვის გადაეცა.
„2012 წლის 6 ნოემბერს, აჭარის ავტონომიური რესპუბლიკის ფინანსთა და ეკონომიკის სამინისტროში შემოვიდა შპს "ეს დაბლიუ-ინნ"-ის წერილი, სადაც მყიდველი აღნიშნავს, რომ მათ მიერ შეძენილ მიწის ნაკვეთზე ამ მომენტისათვის სრული ტემპით მიმდინარეობს სამშენებლო სამუშაოები თანამედროვე სასტუმრო კომპლექსის ასაგებად. ნასყიდობის ხელშეკრულების თანახმად სასტუმრო კომპლექსი უნდა შედგებოდეს არაუმეტეს 100 სასტუმრო ნომრისაგან, ხოლო მისი ექსპლუატაციაში გაშვება უნდა იქნას განხორციელებული ხელშეკრულების გაფორმებიდან არაუგვიანეს 20 თვის ვადაში.
მაგრამ, გარკვეული სამშენებლო სამუშაოების ჩატარებისას, კერძოდ ბურღვის და ფუნდამენტური ხიმინჯის საძირკვლის ჩაყრისას, გამოჩნდა გაუთვალისწინებელი პრობლემები, რომელიც დაკავშირებულია გრუნტის ფენების გაწყლოვანებასთან, რამაც იმოქმედა სამუშაოს შესრულების მსვლელობაზე და შესაბამისად გაიზარდა მათი შესრულების ვადაც. ასევე, სასტუმრო კომპლექსის მშენებლობის პროცესში გადაიხედა ადრე შეთანხმებული სასტუმრო ოთახების რაოდენობაზე და მათი რიცხვი გაზრდილ იქნა 159-მდე. გამომდინარე აქედან, მყიდველი სასტუმრო კომპლექსის ექსპლუატაციაში შეყვანისათვის ითხოვს ვადის გაგრძელებას 2014 წლის 31 მაისამდე"- განმარტავენ აჭარის ფინანსთა და ეკონომიკის სამინისტროში.