მინისტრის განმარტებით, გადაიხედება ყველა ის პროექტი, რომელიც გრუნტისთვის შეუსაბამო ადგილებში მრავალსართულიანი სასტუმროების მშენებლობას ითვალისწინებდა, ხოლო იმ კომპანიებს, რომლებიც მშენებლობას სწრაფად და ხარისხიანად ახორციელებენ, მთავრობის მხრიდან მაქსიმალური მხარდაჭერა ექნებათ.

„ჯი-ეიჩ-ენის" ინფორმაციით, აჭარის მთავრობამ უკვე განიხილა, კომპანია " Tam Geo"-ს მიერ განსახორციელებელი პროექტი, რომელიც ბათუმში 33 სართულიანი სასტუმრო აშენებას ითვალისწინებდა, თუმცა ინვესტორსა და მთავრობას შორის მიღწეული ახალი შეთანხმებით „Tam Geo" ბათუმში 33 სართულიანი სასტუმროს ნაცვლად, 20 სართულიან სასტუმროს ააშენებს.  ინვესტორი აღნიშნულ პროექტში არანაკლებ 20 მილიონი აშშ დოლარი ინვესტიციას განახორციელებს.

აჭარის მთავრობის მეთაურის 2012 წლის 31 იანვრის #23 ბრძანებით, შპს "Tam Geo"-ს პირდაპირი მიყიდვის ფორმით საკუთრებაში გადაეცა ბათუმში, რუსთაველის ქ #30-ში მდებარე 3670 კვმ არასასოფლო-სამეურნეო დანიშნულების მიწის ნაკვეთი და ნინოშვილის ქ #23-ში მდებარე 513,3 კვმ შენობა-ნაგებობა და მასზე დამაგრებული 982 კვმ არასასოფლო-სამეურნეო დანიშნულების მიწის ნაკვეთი.

იმავდროულად, თებერვალში აჭარის ფინანსთა და ეკონომიკის სამინისტროსა და კომპანია "Tam Geo "-ს შორის ტურისტული ინფრასტრუქტურის განვითარების მიზნით ერთ-ერთი მნიშვნელოვანი ხელშეკრულება გაფორმდა, რომლის მიხედვითაც ინვესტორს ბათუმში, რუსთაველის ქუჩა №30-ში 33 სართულიანი, არანაკლებ 141 მეტრი სიმაღლის, 120 ნომრის მქონე 4 ვარსკვლავიან სასტუმრო კომპლექსი უნდა აეშენებინა.

პირველადი ხელშეკრულების მიხედვით, სასტუმროს მშენებლობა 2015 წლის 30 ივნისამდე უნდა დასრულებულიყო. ხელშეკრულების მიხედვითვე, სასტუმრო - კომპლექსში გამოყოფს 3080 კვმ ფართს ავტოსადგომისათვის და პროექტში დასაქმებულთა 90%-ი იქნება საქართველოს მოქალაქე.

ხელშეკრულების ხელმოწერისა და საქართველოს იუსტიციის სამინისტროს საჯარო რეესტრის ეროვნულ სააგენტოში უძრავ ქონებაზე საკუთრების უფლების მყიდველის სახელზე დარეგისტრირების შემდგომ, მყიდველი ვალდებული იყო გადაეხადა უძრავი ქონების ნასყიდობის ფასი ექვს ეტაპად. საფასურის ბოლო ნაწილი კი ინვესტორს 2013 წლის 31 აგვისტომდე უნდა დაეფარა.

ასევე 2012 წლის 30 ივნისამდე განეხორციელებინა მშენებლობის დაწყებისათვის საჭირო წინასწარი სამუშაოების წარმოება და მშენებლობის ნებართვის მოპოვება;

თუმცა, აჭარის ავტონომიური რესპუბლიკის მთავრობის თავმჯდომარის 2012 წლის 31 დეკემბრის #436 ბრძანების საფუძველზე ინვესტორსა და მთავრობას შორის დადბულ ხელშეკრულებაში, ნასყიდობის თანხის გადახდის ნაწილში შევიდა ცვლილებები და ინვესტორმა თანხა სრულად 2014 წლის 28 თებერვლამდე უნდა დაფაროს.
ცვლილებები შევიდა ასევე ხელშეკრულებით გათვალისწინებული ვალდებულებების შესრულების ნაწილში: 2013 წლის 30 აპრილამდე დაიწყოს სასტუმროს მშენებლობა;

2014 წლის 30 დეკემბრამდე უზრუნველყოს სასტუმროს შენობის ბეტონის ნაგებობის აღმართვა.
არაუგვიანეს 2015 წლის 31 დეკემბრამდე უზრუნველყოს მშენებლობის დასრულება და ექსპლუატაციაში შეყვანა;

იმავდროულად, "Tam Geo "-მ დამატებითი ვალდებულებები აიღო, კერძოდ 2013 წლის 30 ოქტომბრამდე ტერიტორიაზე (ქ.ბათუმში, რუსთაველის ქ #30-ში მდებარე 3670 კვმ არასასოფლო-სამეურნეო დანიშნულების მიწის ნაკვეთზე) ძირითადი კონსტრუქციული სისტემის მოწყობის დასრულება შენობა-ნაგებობის ნულოვან ნიშნულამდე;
2014 წლის 30 ივლისამდე ასაშენებელი შენობის (ქ.ბათუმში, რუსთაველის ქ #30-ში მდებარე 3670 კვმ არასასოფლო-სამეურნეო დანიშნულების მიწის ნაკვეთზე) ნაწილის _ არანაკლებ 20 სართულის მქონე შენობის ბეტონის ნაგებობის აღმართვა;