ევროკავშირის პროექტის „სახელმწიფო სექტორის ფინანსური მართვის რეფორმის მონიტორინგის მხარდამჭერი პროგარამა" (Support to Monitoring of the Public Finance Management Reforms Suport Program) ორგანიზებით, ქართული მხარისა და საერთაშორისო ორგანიზაციების მონაწილეობით, დღეს შემაჯამებელი შეხვედრა გაიმართა, რომელზედაც ფისკალური პროგნოზირებისა და მაკროეკონომიკური მოდელირების საკითხები განიხილეს.
შეხვედრას ფინანსთა მინისტრი ნოდარ ხადური და საქართველოში ევროკავშირის წარმომადგენლობის ხელმძღვანელი ფილიპ დიმიტროვი ესწრებოდნენ.
„ევროკავშირის დახმარებით ფინანსთა სამინისტროში ხორციელდება საჯარო ფინანსების მართვის სისტემის რეფორმა და ამ რეფორმის ფარგლებში ფინანსთა სამინისტროში ერთი თვის განმავლობაში უცხოელი ექსპერტები მუშაობდნენ. მიმდინარეობდა მუშაობა მაკროეკონომიკური პროგნოზირების გაუმჯობესების მიმართულებით, ჩატარდა ტრენინგები ფინანსთა სამინისტროსა და პარლამენტის თავმჯდომარის აპარატის თანამშრომლებისათვის"- განაცხადა ნოდარ ხადურმა.
როგორც ფინანსთა სამინისტროში განმარტავენ, საერთაშორისო ექსპერტი, მერილენდის უნივერსიტეტის პროფესორი მანუჩარ მოხტარი, რომელიც მაკროეკონომიკური მოდელირებისა და ფისკალური პროგნოზირების საკითხებზე მუშაობდა სხვადასხვა ქვეყანაში, ერთი თვის განმავლობაში აქტიურად მუშაობდა საქართველოს ფინანსთა სამინისტროს ფისკალური პროგნოზირების დეპარტამენტისა და პარლამენტის საფინანსო საბიუჯეტო კომიტეტის თანამშრომლებთან და ჰქონდა სამუშაო შეხვედრები როგორც ფინანსთა სამინისტროში, ისე საქართველოს პარლამენტში.
მან მიმდინარე წლის 21-22 იანვარს ფინანსთა სამინინისტროს აკადემიაში სახელმწიფო ფინანსების მართვის მხარდამჭერი პროექტის ფარგლებში ჩაატარა ტრეინინგი თემაზე „მაკროეკონომიკური მოდელირება და ბიუჯეტის როლი საპარლამენტო პროცესში" , რომელსაც ესწრებოდნენ ფინანსთა სამინისტროსა და პარლამენტის საფინანსო-საბიუჯეტო კომიტეტის, ასევე პარლამენტის საბიუჯეტო ოფისის თანამშრომლები.
