საქართველოს სოფლის მეურნეობის მინისტრი დავით კირვალიძე გერმანიაში სამუშაო ვიზიტის ფარგლებში სასოფლო-სამეურნეო პროდუქტების საერთაშორისო გამოფენა „მწვანე კვირეულს" ესწრება. აღნიშნული გამოფენა ბერლინში გერმანიის კანცლერმა ანგელა მერკელმა გახსნა. მასში 123 ქვეყნის წარმომადგენელი იღებს მონაწილეობას.
საქართველოს სოფლის მეურნეობის მინისტრმა ორმხრივი შეხვედრები გერმანიის, ჰოლანდიის, უნგრეთის, ლიტვის, ესტონეთისა და სომხეთის სოფლის მეურნეობის მინისტრებთან და უკრაინის სოფლის მეურნეობის მინისტრის მოადგილესთან გამართა.
„კიდევ ერთხელ დადასტურდა დიდი ინტერესი ქართული ღვინისადმი. მრავალი ქვეყნის დელეგაცია იყო ჩამოსული, მათ შორის რუსეთის, რომლებიც ქართული პროდუქციისადმი დიდ ინტერესს გამოხატავდნენ. ჩვენთვის ძალიან მნიშვნელოვანია, რომ წელს ქართული ღვინო მომხმარებელთა მხრიდან შეფასდა, როგორც ერთ-ერთი საუკეთესო პროდუქტი. იმედი გვაქვს, რომ უახლოეს მომავალში ქართული ღვინო საერთაშორისო ბაზარზე საპატიო ადგილს დაიკავებს", - განაცხადა დავით კირვალიძემ.
საქართველოს სოფლის მეურნეობის სამინისტროსა და გერმანიის ტექნიკური თანამშრომლობის (GIZ) მხარდაჭერით გამოფენაში მონაწილეობას იღებენ ქართული კომპანიები „ქინძმარაული", ტიბაანელი", „ბადაგონი", „შატო მუხრანი", „ელკანა", „მილდიანი", „შუხმანი", GWS და "არომა პროდუქტი".
