დღეს, 17 იანვარს, 19:00 სთ-ზე, საქართველოს კულტურისა და ძეგლთა დაცვის სამინისტროში, კურატორი იოანა ვარშა ისაუბრებს ვენეციის 55-ე ბიენალეზე წარსადგენი ქართული პავილიონის კონცეფციის შესახებ და დამსწრე საზოგადოებას პროექტში ჩართულ ხელოვანებს გააცნობს. იოანნა ვარშა ასევე ისაუბრებს ბერლინის ბიენალეზე მიღებული გამოცდილების შესახებ, რომელშიც იგი ასოცირებული კურატორის სტატუსით მონაწილეობდა.
კულტურის სამინისტროს ინფორმაციით, კონკურსი საკურატორო წინადადებაზე ქართული პავილიონის წარსადგენად ვენეციის 55-ე ბიენალეზე კულტურის სამინისტრომ 2012 წლის 3 დეკემბერს გამოაცხადა, სულ შემოვიდა 17 საკურატორო წინადადება. კომისიამ ორდღიანი განხილვის შედეგად შეარჩია კურატორ იოანნა ვარშას პროექტი, რომელიც ქართველ ხელოვანთა ჯგუფს წარმოადგენს.
წლევანდელი ბიენალეს თემაა „ცოდნის ტაძარი". ფორუმი გაიხსნება ვენეციაში 2013 წლის 1 ივნისს.
კომისიის შემადგენლობა:
1. მარინე მიზანდარი - კომისიის თავმჯდომარე, კულტურისა და ძეგლთა დაცვის მინისტრის პირველი მოადგილე.
2. ლალი პერტენავა - ხელოვნებისა და კულტურის ქსელური პროგრამის კოორდინატორი, ფონდი "ღია საზოგადოება - საქართველო".
3. ხათუნა ხაბულიანი - თბილისის სახელმწიფო სამხატვრო აკადემიაში ხელოვნების ისტორიის ლექტორი, კურატორი, არტ კრიტიკოსი.
4. ანა რიაბოშენკო - არასამთავრობო ორგანიზაცია "TRAM"-ის დამფუძნებელი.
5. ლაშა ბაქრაძე - საქართველოს გ. ლეონიძის სახელობის სახელმწიფო ლიტერატურული მუზეუმის დირექტორი.
6. ლიკა მამაცაშვილი - კურატორი, თბილისის ისტორიის მუზეუმი "ქარვასლა".
