უნგრული კომპანიები საქართველოს სოფლის მეურნეობაში ინვესტიციებს განახორციელებენ. ამის შესახებ უნგრეთის ელჩმა შანდორ საბომ საქართველოს სოფლის მეურნეობის მინისტრთან, დავით კირვალიძესთან შეხვედრაზე განაცხადა. ელჩმა მინისტრს უნგრელი კოლეგის მისალოცი წერილი და მოწვევა გადასცა. შეხვედრაზე 2 ქვეყანას შორის გაფორმებული ურთიერთგაგების მემორანდუმით გათვალისწინებული თანამშრომლობის დეტალები განიხილეს. საბომ მინისტრის სოფლის-მეურნეობის სექტორში მომუშავე იმ უნგრელი კომპანიების შესახებაც მიაწოდა ცნობები, რომლებიც საქართველოში ინვესტიციების განხორციელებას გეგმავენ.
შანდორ საბომ ისაუბრა იმ სირთულეებზე, რომელიც უნგრეთმა და სხვა აღმოსავლეთ ევროპულმა სახელმწიფოებმა ტრანზიციის პერიოდში გაიარეს და აღნიშნა, რომ საქართველოს უკვე აქვს შესაძლებლობა გაიზიაროს ამ რეგიონის მიერ დაგროვილი გამოცდილება ნებისმიერი მიმართულებით, მათ შორის სოფლის მეურნეობის განვითარების კუთხითაც, რაც პროცესს გაცილებით გაამარტივებს.
უნგრეთი სოფლის მეურნეობის და კვების მრეწველობის განვითარების კუთხით ერთ-ერთი წამყვანი ქვეყანაა ევროკავშირში, მისი საექსპორტო პროდუქციის 1/3 სასოფლო-სამეურნეო პროდუქტზე მოდის.