დასავლური სახელმწიფოების მიერ წარდგენილი ბრალდებების წინააღმდეგ, რომელიც ირანის ბირთვულ პროგრამას ეხება, ისლამური რესპუბლიკის საგარეო საქმეთა სამინისტრო განცხადებას აკეთებს. კერძოდ, ქვეყნის მთავარი დიპლომატიური უწყება აცხადებს, რომ დასავლეთი ვერ ერკვევა ძველი სპარსელების შთამომავალთა კულტურაში, თორემ აქამდეც დაიჯერებდა მათ მშვიდობიან მიზნებს, ბირთვულ პროგრამასთან დაკავშირებით. საგარეო საქმეთა სამინისტროს, ამის არგუმენტად კი მიჰყავს ის, რომ ქვეყნის რელიგიურმა ლიდერმა, აიათოლა ალი ხამენეიმ ბირთვული იარაღის წარმოება სასტიკად აკრძალა.
ირანის ისლამური რესპუბლიკის საგარეო საქმეთა სამინისტროს პრეს-მდივნის, რამინ მეხმანპარასტის განცხადებით, ირანელებისთვის არაფერი არაა ისეთი მნიშვნელოვანი, როგორც მათი სულიერი ლიდერის აზრი. შესაბამისად, აიათოლას მოსაზრებები, მათ შორის, ბირთვულ იარაღზე, მათი ცხოვრების ინსტრუქციაა. „როცა სულიერი ლიდერი გამოთქვამს თავის აზრს, ჩვენ უბრალოდ ვალდებულებები ვართ ეს შევასრულოთ", - აღნიშნავს დიპლომატი.
რამდენად დაიჯერებენ ირანის ოპონენტი ამ განცხადებას, მალე გახდება ცნობილი. „ექვსეულის" მორიგი შეხვედრა სტამბოლში, თებერვალშია დანიშნული, სადაც ირანთან მიმართებაში მთელი რიგი საკითხები გაირკვევა.
