რეგიონული განვითარების თვალსაზრისით, განსაკუთრებული ყურადღება დაეთმობა ადგილობრივი თვითმმართველობის რეფორმის გახორციელებას და მის ფარგლებში დაგეგმილ ღონისძიებებს, რაც მოიცავს: მმართველობის სისტემის დეცენტრალიზაციის, ადგილობრივი თვითმმართველობის ოპტიმიზაციისა და გაძლიერების, ხელისუფლების რეგიონული დონის მოდიფიცირებისა და სრულყოფის მიმართულებით დაგეგმილ ღონისძიებებს. მნიშვნელოვან რეფორმებთან დაკავშირებული საკანონმდებლო ინიციატივების მომზადებას. ასევე, რეფორმების გახორციელების სამართლებრივ-ტექნიკურ უზრუნველყოფასა და კოორდინაციას; რეგიონული განვითარების სტრატეგიების შემუშავებისა და გახორციელების სისტემის სრულყოფას.

უწყების ინფორმაციით, ინფრასტრუქტურის მოწესრიგება რეგიონული განვითარების ერთ-ერთი უმთავრესი წინაპირობაა. ამდენად, ეს ორი სფერო ერთმანეთთან მჭიდრო კავშირშია. ინფრასტრუქტურის მიმართულება მოიცავს: საერთაშორისო და შიდასახელმწიფოებრივი გზების (240 კმ), ხიდების (30 ხიდი), გვირაბების (3 გვირაბი) მშენებლობა-რეაბილიტაციას, საქართველოს რეგიონებში (42 მუნიციპალიტეტში) წყალმომარაგების სისტემის სარეაბილიტაციო სამუშაოების და ნაპირსამაგრი სამუშაოების განხორციელებას. ასევე, ნაგავსაყრელების მართვასა და ინ¬ფრა¬სტრუქ¬ტურული ობიექტების სამშენებლო, სარეაბილიტაციო და სხვა სახის სამუშაოების განხორციელების კოორდინაციას.

2013 წლის სამოქმედო გეგმა, ასევე, მოიცავს:

სამინისტროს სისტემის სტრუქტურულ ოპტიმიზაციასა და კადრების ატესტაციას;
სერვისის ხარისხის გაუმჯობესებას, რაც გულისხმობს სატენდერო პირობებში მკაცრი და მკაფიო ხარისხის მოთხოვნების ჩადებასა და ხარისხის კონტროლის გაძლიერებას;
პროექტების კოორდინაციის მოწესრიგებული სისტემის შექმნასა და და მმართველობითი წესრიგის დამყარებას;
საზოგადოების ინფორმირებულობასა და სამინისტროს საქმიანობის გამჭვირვალეობის უზრუნველყოფას.

წყალმომარაგებისა და საგზაო ინფრასტრუქტურის მშენებლობა-რეაბილიტაციის თვალსაზრისით დაგეგმილია როგორც ახალი მსხვილი ინფრასტრუქტურული პროექტების, ისე მიმდინარე პროექტების გახორციელება. მათ შორის, განსაკუთრებით აღსანიშნავია:

აზიის განვითარების ბანკის დაფინანსებით მიმდინარე წყალმომარაგების სარეაბილიტაციო სამუშაოები ქუთაისში, ფოთში, ურეკში, ანაკლიასა და მესტიაში.

ევროპის საინვესტიციო ბანკის დაფინანსებით მიმდინარე წყალმომარაგების მშენებლობა-რეაბილიტაციის პროექტები საქართველოს 28 ქალაქში.

ჩქაროსნული ავტომაგისტრალის რუისი-აგარას 19 კმ-იანი მონაკვეთის მშენებლობა. აღნიშნულ მონაკვეთზე აშენდება 2 ესტაკადა, 5 გზაგამტარი; დაიწყება აგარა-გომის 12 კმ-იანი მონაკვეთის მშენებლობა. იგოეთი-რუისის მონაკვეთზე დასრულდება დარჩენილი სამუშაოები. გაგრძელდება ზესტაფონი-ქუთაისი-სამტრედიის 58 კმ მონაკვეთის მშენებლობა, დაიწყება სამტრედია-ლანჩხუთის 30 კმ-იანი მონაკვეთის მშენებლობა, დასრულდება ქობულეთის შემოვლითი გზის პირველი ლოტის (15 კმ) მშენებლობა, დაიწყება ამავე გზის მეორე ლოტის მშენებლობა (18 კმ);

ქ. თბილისში მეტროსადგურ ვაჟა-ფშაველასა და უნივერსიტეტის დამაკავშირებელი გვირაბისა და უნივერსიტეტის სადგურის მშენებლობა (2,2 კმ სიგრძის გვირაბი);

თბილისი-რუსთავის ჩქაროსნული საავტომობილო გზის II მონაკვეთის პროექტირების დასრულება და სამშენებლო სამუშაოების დაწყება პირველ და მესამე მონაკვეთებზე (17 კმ. ჩქაროსნული 4-ზოლიანი გზა);

დევნილთა სახლების მშენებლობა-რეაბილიტაცია და ა.შ.

ინფორმაციის გამჭვირვალობის თვალსაზრისით, სამინისტრო გეგმავს, სრულად შეცვალოს წარსული მანკიერი პრაქტიკა. ამისთვის:
მოხდება სამინისტროს და მის დაქვემდებარებაში მყოფი სტრუქტურული ერთეულების ვებ-გვერდების მოდერნიზება. დაინტერესებულ პირებს შესაძლებლობა ექნებათ, მათთვის საინტერესო ყველა საჯარო ინფორმაცია მოიძიონ აღნიშნულ ვებ-გვერდებზე;

დაგეგმილი და მიმდინარე პროექტების მონიტორინგის პროცესში აქტიურად ჩერთვებიან არასამთავრობო ორგანიზაციები; ამასთან, წელიწადში 2-ჯერ ჩატარდება საინფორმაციო და საკონსულტაციო შეხვედრები იმ არასამთავრობო ორგანიზაციებთან, რომლებიც სამინისტროს კომპეტენციას მიკუთვნებულ საკითხებზე მუშაობენ;

პერიოდულად ჩატარდება დონორ ორგანიზაციებთან საკოორდინაციო და საინფორმაციო შეხვედრები, რაც, ერთი მხრივ, ხელს შეუწყობს დონორი ორგანიზაციების მიერ დაფინანსებული პროექტების კოორდინაციას და მეორე მხრივ, გაზრდის სამინისტროს საქმიანობის საერთაშორისო გამჭვირვალობას;

სამინისტროში არსებობს საჯარო ინფორმაციის გაცემაზე პასუხისმგებელი პირი და მისი მეშვეობით მოხდება საჯარო ინფორმაციის გაცემა დაინტერესებულ ფიზიკურ და იურიდიულ პირებზე. შიდა აუდიტის სამსახურის მიერ გატარდება მონიტორინგი საჯარო ინფორმაციის გაცემაზე.

მთლიანობაში, სამინისტროს საქმიანობა დაფუძნებული იქნება გამჭვირვალობის, ეფექტიანობის ამაღლებისა და პროექტების ხარისხის გაუმჯობესების პრინციპებზე.