ენერგეტიკისა და ბუნებრივი რესურსების სამინისტრო მოსახლეობისათვის ელექტროენერგიის მიწოდების ხარისხის მონიტორინგს იწყებს და ქსელში დაგეგმილი სარეაბილიტაციო სამუშაოების შესახებ, საზოგადოებას ინფორმაციას მედიისა და სოციალური ქსელის საშუალებით წინასწარ მიაწვდის.
ელექტროგამანაწილებელ ქსელში სისტემური გამორთვები ჩვეულებრივი სამუშაო პროცესია, რადგან ამ დროს ინფრასტრუქტურის რეაბილიტაცია ხორციელდება. გარდა ამისა, ზამთრის პერიოდში და ხშირად, უამინდობისას ავარიული გათიშვებიც ფიქსირდება, თუმცა კომპანიების ტექნიკური პერსონალი შესაბამის სამუშაოებს 24-საათიან რეჟიმში აწარმოებს, რათა დროულად უზრუნველყოს სისტემის გამართული მუშაობა და მოსახლეობის ელექტროენერგიით მომარაგება.
2012 წელს წინა წლებთან შედარებით, ელექტროგამანაწილებელ ქსელში სისტემური გამორთვები მნიშვნელოვნად შემცირდა. კერძოდ, თბილისში შარშან გათიშვების 1761 ფაქტი დაფიქსირდა, 2011 წელს - 1965 ფაქტი, ხოლო 2010 წელს - 2291 ფაქტი.
რაც შეეხება რეგიონებს, 2012 წელს 1157 შემთხვევა (საშუალოდ თვეში) დაფიქსირდა, 2011 წელს - 1357 შემთხვევა (საშუალოდ თვეში), ხოლო 2010 წელს - 1439 შემთხვევა (საშუალოდ თვეში).
წინა წლის ანალოგიურ პერიოდთან შედარებით, მიმდინარე თვის მონაცემებით, თბილისისა და რეგონების ელექტროენერგიის გამორთვის რაოდენობა მნიშვნელოვნადაა შემცირებული. ენერგეტიკისა და ბუნებრივი რესურსების სამინისტრო მაქსიმალურ ყურადღებას მიაქცევს, რათა ელექტროგამანაწილებელ ქსელში გათიშვების კლების ტენდენცია შენაჩუნდეს
