სირიის პრეზიდენტი, ბაშარ ასადი ოჯახთან ერთად სამხედრო ხომალდის ბორტზე გადავიდა, რომელსაც რუსული უსაფრთხოების სამსახური იცავს. ამ ინფორმაციას არაბული მედია ავრცელებს. კონკრეტულად რომელ ხომალდზე იმყოფება სირიის პრეზიდენტი, რუსულზე თუ სირიულზე, არ კონკრეტდება.
მედიის ინფორმაციითვე, ცნობა ასადის ხომალდზე ყოფნის შესახებ ქაიროდან გავრცელდა. მათი მონაცემებით, სირიის ლიდერს თან ახლავს არა მხოლოდ ოჯახის წევრები, არამედ, უახლოესი თანამებრძოლებიც. თუმცა, ეს იმას არ ნიშნავს, რომ ასადი სამუდამოდ წავიდა სირიიდან. მზვერავების ინფორმაციით, ის პერიოდულად ბრუნდება ქვეყანაში, ვერტმფრენის საშუალებით, , მხოლოდ აუცილებლობის შემთხვევაში.
საუდის არაბეთის გაზეთები, გამოთქვამენ ვარაუდებს, თუ რატომ გადავიდა ასადი ხომალდზე. ყველაზე პოპულარული ორი ვერსიაა. ერთის მიხედვით, პრეზიდენტი საკუთარ დაცვას აღარ ენდობა, რომელმაც მას შეიძლება უღალატოს, ხოლო მეორე ვერსიით, ამ საშუალებით მას უფრო გაუდვილდება გაქცევა, თუ ოპოზიცია გაიმარჯვებს. არაბული პრესა იმასაც ირწმუნება, რომ ასადმა რუსეთთან უკვე მიაღწია პოლიტიკური თავშესაფრის მიღების შესახებ შეთანხმებას.
