საქართველოში სტუმრად მყოფი კონსტანტინეპოლისა და ახალი რომის მთავარეპისკოპოსი, მსოფლიო პატრიარქი, ბართლომეოს პირველი და უწმინდესი და უნეტარესი ილია მეორე მიხეილ სააკაშვილმა დღეს პრეზიდენტის სასახლეში მიიღო.
პრეზიდენტის ადმინისტრაციის ინფორმაციით, ქვეყნის პირველმა პირმა და მსოფლიო პატრიარქმა კიდევ ერთხელ მიულოცეს საქართველოს პატრიარქს დაბადებისა და აღსაყდრების საიუბილეო თარიღი. მიხეილ სააკაშვილმა უწმინდესის დიდ ღვაწლზე ისაუბრა და აღნიშნა, რომ მისი საიუბილეო თარიღი მთელი ერისთვის საყოველთაო ზეიმია.
თავის მხრივ, მსოფლიო პატრიარქმა კიდევ ერთხელ გადაუხადა მადლობა მიხეილ სააკაშვილს გულთბილი დახვედრისთვის, დალოცა სრულიად საქართველო, უწმინდესი, საქართველოს პრეზიდენტი და მათ დღეგრძელობა და ქვეყნის საკეთილდღეოდ სიძლიერე უსურვა.
შეხვედრას სრულიად საქართველოს კათოლიკოს-პატრიარქი ილია მეორე, საქართველოს პარლამენტის თავმჯდომარე დავით უსუფაშვილი, სერბეთის პატრიარქი და ბულგარეთის პატრიარქის მოსაყდრე ესწრებოდნენ.
მიხეილ სააკაშვილმა ბართოლომეოს პირველს მადლობა გადაუხადა პატრიარქის იუბილესადმი მიძღვნილ ღონისძიებებში მონაწილეობისთვის.
„ თქვენო უწმინდესობავ, ჩვენთვის დიდი პატივია თქვენი საქართველოში ყოფნა, თქვენ ძალიან დიდ პატივს გცემენ, არა მხოლოდ, როგორც სულიერ მამას , არამედ, როგორც გამორჩეულ პიროვნებას. ჩვენ ყოველთვის მივესალმებით თქვენს ჩამობრძანებას, თქვენ საქართველოს ნამდვილად დიდი მეგობარი ბრძანდებით, ძალიან მადლობლები ვართ იმ ღვაწლის გამო, რომელიც თქვენ ერთიანი მართლმადიდებულ ეკლესიის გაძლიერებაში მიგიძღვით, ასევე იმ წვლილისთვის რაც თქვენ რეგიონებს შორის მოლაპარაკებებში შეგაქვთ.
ჩვენთვის დიდი პატივია, რომ თქვენი ვიზიტი დაემთხვა ჩვენი პატრიარქის 35-ე აღსაყდრების წლისთავსა და 80 წლის იუბილეს და ეს დიდი პატივისცემის გამოხატულებაა თქვენი მხრიდან. რა თქმა უნდა, ჩვენ ყველას გვიყვარს პატრიარქი და ამიტომაცაა, რომ საქართველო ასეთი მადლიერია თქვენი. ეს თარიღი არამხოლოდ პატრიარქის იუბილე, არამედ საერთო ქართული დღესასწაულია,"- განაცხადა პრეზიდენტმა.
მანვე მადლობა გადაუხადა საქართველოს პარლამენტის თავმჯდომარეს ამ ღონისძიების ორგანიზებაში შეტანილი წვლილისთვის.
თავის მხრივ, დავით უსუფაშვილმა კიდევ ერთხელ გადაუხადა მადლობა ბართოლომეოს პირველს, იმისთვის რომ იგი უწმინდესი და უნეტარესი ილია მეორის იუბილეზე საქართველოში იმყოფება, ხოლო საქართველოს პატრიარქს იმ გაწეული მოღვაწეობისათვის, რომელიც მან საქართველოს მართლმადიდებლური ეკლესიის გაძლიერებაში შეიტანა.
მსოფლიო პატრიარქმა საუბრისას აღნიშნა, რომ მისთვის ძალიან მნიშვნელოვანია პატრიარქის დაბადებისა და აღსაყდრების საიუბილეო თარიღზე საქართველოში ყოფნა.
„ძალიან სასიამოვნო ფაქტია ყველა ჩვენგანისათვის, რომ პატრიარქის იუბილეზე ვიმყოფებით საქართველოში. ვუსურვებ უწმინდესსა და უნეტარესს დღეგრძელობას, რათა დიდხანს ემსახუროს ეკლესიასა და ქართველ ერს და ვლოცავ სრულიად საქართველოს და თქვენ, თქვენო აღმატებულებავ, გისურვებთ ღვთისნიერ კურთხევასა და მხნეობას , რათა ნაყოფიერად ემსახუროთ საქართველოს."- განაცხადა ბართლომეოს პირველმა.
შეხვედრის დასრულების შემდეგ კონსტანტინეპოლისა და ახალი რომის მთავარეპისკოპოსი, მსოფლიო პატრიარქმა, ბართლომეოს პირველმა ქვეყნის პირველ პირს სიმბოლური საჩუქარი გადასცა, რის შემდეგ პრეზიდენტის სახელით ორგანიზებული, მსოფლიო პატრიარქის საპატივსაცემო საზეიმო ვახშამი გაიმართა.