პოლონეთის პოლიციამ მიიღო ინფორმაცია ქვეყნის პრემიერ-მინისტრ დონალდ ტუსკსა და თავდაცვის მინისტრ ვლადისლავ კოსინიაკ-კამიშზე შესაძლო თავდასხმის შესახებ.
მედიის ცნობით, ამის შესახებ პოლონეთის სპეცსამსახურების წარმომადგენელმა, იაცეკ დობჟინსკიმ განაცხადა.
„პოლიციაში შესული ინფორმაციის გათვალისწინებით, რომელიც პრემიერ-მინისტრ დონალდ ტუსკსა და თავდაცვის მინისტრ ვლადისლავ კოსინიაკ-კამიშზე შესაძლო თავდასხმას ეხება, სპეცსამსახურების ხრლმძღვანელმა ტომაშ სემონიაკმა და შინაგან საქმეთა მინისტრმა მარცინ კერვინსკიმ შესაბამის უწყებებს ამ საკითხზე ზომების მიღება დაავალეს“, - განაცხადა დობჟინსკიმ.
მისივე ინფორმაციით, 11 ოქტომბერს, ვარშავის დროით 11:00 საათზე, დაგეგმილი იყო შეხვედრა შიდა უსაფრთხოების სააგენტოსა და შინაგან საქმეთა სამინისტროს დაქვემდებარებული უწყებების - პოლიციისა და სახელმწიფო დაცვის სამსახურის წარმომადგენლებს შორის.
პოლონეთის ხელისუფლებას შესაძლო თავდასხმის შესახებ ინფორმაციის შინაარსი და სავარაუდო საფრთხის დეტალები ამ განცხადებაში არ დაუკონკრეტებია.
ცოტა ხნის წინ პოლონეთის პრემიერ-მინისტრმა დონალდ ტუსკმა განაცხადა, რომ დაზვერვის მონაცემები მიუთითებს რუსეთის გეგმებზე, უკრაინის მხარდამჭერი ქვეყნების წინააღმდეგ ჰიბრიდული თავდასხმები განახორციელოს.
