თბილისის მერიის განმარტებით, ინიციატივა, რომელიც მოსახლეობისთვის ბუნებრივი აირის გამათბობლებისა და წყლის გამაცხელებლების უფასოდ შემოწმებას გულისხმობს, მერიას ეკუთვნის და მსგავს პროექტს მერია სამი წლის განმავლობაში ახორციელებდა. ამასთან დაკავშირებით, განცხადება მერიის სპიკერმა ბაჩო დოლიძემ გააკეთა, რომელსაც თბილისის მერია ავრცელებს.
"დღეს ჩვენ მოვისმინეთ ენერგეტიკის სამინისტროში გაკეთებულ განცხადება ახალი პროექტის დაწყების შესახებ, ძალიან კარგი პროექტია შინაარსობრივად. თბილისის მერია მიესალმება მსგავსი პროექტების გაგრძელებას და არა - დაწყებას. ჩვენ უკვე სამი წელია, ვახორციელებთ ამ პროექტს. მივესალმებით ყველა იმ პროექტის გაგრძელებას, რომელიც ჩვენს მიერ იყო წამოწყებული, თუმცა, უხერხულად გვეჩვენება, როდესაც ხდება კონკრეტული პროექტის ისე შეფუთვა, ვითომ ისინი არიან ავტორები", - აცხადებს დოლიძე.
მოსახლეობისთვის ბუნებრივი აირის გამათბობლებისა და წყლის გამაცხელებლების უფასოდ შემოწმებასთან დაკავშირებით პროექტის "უსაფრთხო ზამთარი" პრეზენტაცია,დღეს, ენერგეტიკის მინისტრის მოადგილე ილია ელოშვილმა და "ყაზტრანსგაზ თბილისის" სპეციალურმა მმართველმა ანი თაქთაქიშვილმა გამართეს.
