ტელერადიო დეპარტამენტს ახალი ხელმძღვანელი ჰყავს. ამ თანამდებობაზე დღეს ბათუმელი სოსო სტურუა დაინიშნა. მას ჟურნალისტიკაში მოღვაწეობის 20-წლიანი გამოცდილება აქვს. აქედან 16 წელი იგი აჭარის ტელერადიო დეპარტამენტში სხვადასხვა დროს კორესპონდენტის, რედაქტორის, საინფორმაციო, მარკეტინგის სამსახურების უფროსისა და დოკუმენტური ფილმების პროდიუსერის თანამდებობებზე მუშაობდა. ამავე არხზე იყო პოლიტიკური თოქ-შოუს წამყვანიც.
სოსო სტურუა 60-მდე ეთნოგრაფიული დოკუმენტური ფილმის ავტორი და რეჟისორია, მინიჭებული აქვს თედო სახოკიას სახელობის სახელმწიფო დარგობრივი პრემია - წმინდა ანდრიას ჯვარი. ბოლო 4 წლის განმავლობაში მუშაობდა საქართველოს საზოგადოებრივ მაუწყებელში სხვადასხვა პროექტის ავტორად და რეჟისორად.
რაც შეეხება არხთან დაკავშირებულ სამომავლო გეგმებს, ახალი ხელმძღვანელის განცხადებით, აჭარის ტელერადიო დეპარტამენტის სტატუსის განსაზღვრამდე, პროგრამული გადახალისება და სტრუქტურული ცვლილებები განხორციელდება.