რუსეთის მთავარმა სახელმწიფო სანიტარულმა ექიმმა, "როსპოტრებნადზორის" ხელმძღვანელმა გენადი ონიშენკომ დაუშვა შესაძლებლობა იმისა, რომ საქართველოს მთავრობის წევრებმა რუსეთის ბაზარზე ქართული ღვინისა და მინერალური წყლის დაბრუნების შესახებ მოლაპარაკებებში მონაწილეობა მიიღონ. ინფორმაციას ამის შესახებ რუსული მედია ავრცელებს.
"გაარკვიონ ვინ ჩამოვა და ჩამოვიდნენ. მზად ვარ 20 იანვრამდე მათ შევხვდე. თუ საქართველოს მთავრობა მოისურვებს, რომ ამ დელეგაციის შემადგენლობაში მთავრობის წარმომადგენლები იყვნენ ჩვენ წინააღმდეგნი არ ვართ", _ განაცხადა გენადი ონიშენკომ რუსულ მედიასთან საუბრისას და აღნიშნა "ჩვენ მზად ვართ მათ შევხვდეთ იანვრის მეორე დეკადაშიც კი".
ამასთან, გენადი ონიშენკომ გააკეთა განცხადება იმის შესახებაც, რომ ის უკვე შეხვდა ქართული ბიზნესის ზოგ წარმომადგენელს.
"ჩვენთვის საინტერესო არის, რომ ქართული დელეგაციის შემადგენლობაში იყვნენ ისეთი სტრუქტურის წარმომადგენლები, რომლებსაც სახელმწიფოსაგან მინიჭებული აქვთ უფლება გააკონტროლონ პროდუქციის ხარისხი და უსაფრთხოება. ყოველივე ეს მოსალოდნელ მოლაპარაკებებს უფრო ეფექტურს გახდიდა. ჩვენ შესაძლოა რაღაც ერთიანი პოზიცია გამოგვემუშავებინა - ინფორმაციის გაცვლისა და რუსეთის ბაზარზე შემოსატანი პრიდუქციის უსაფრთხოების უზრუნველყოფისა", - განაცხადა გენადი ონიშენკომ.