პროექტის მიზანი იყო საზოგადოებრივი ცნობიერებისა და დამოკიდებულებების პოზიტიური ცვლილებები შეზღუდული შესაძლებლობის მქონე პირებთან მიმართებაში თავად ამ პირების საზოგადოებრივი აქტიურობის წარმოჩენის გზით. „ანიკა"-ს დამოუკიდებელი ცხოვრების ცენტრში მასტერკლასები (ფერთა თერაპია, არტ თერაპია, ფერწერა, გაფორმების საშუალებები) გაიარა 33-მა შეზღუდული შესაძლებლობის მქონე ახალგაზრდამ და ბავშვმა.

გამოფენა-გაყიდვაზე წარმოდგენილი იქნება სწორედ მათი ნამუშევრები. გამოფენიდან შემოსული თანხა კი მოხმარდება „დღის ცენტრის" აღსაზრდელებისათვის სამზარეულოს მოწყობას.

ასოციაცია "ანიკა" დაფუძნდა 1997 წელს შეზღუდული შესაძლებლობის მქონე ბავშვთა მშობლების მიერ და მისი მიზანი ინვალიდობის მქონე ბავშვებისა და ახალგაზრდების საზოგადოებაში ინტეგრირება, საზოგადოებრივი ცნობიერების ამაღლება, საგანმანათლებლო პროგრამების წარმართვა, პროფესიული განათლებისა და დასაქმების ხელშეწყობა, თანაბარი შესაძლებლობების უზრუნველყოფა, აგრეთვე, მშობელთა ჩართვა და გაძლიერებაა. 2003 წლიდან ასოციაცია "ანიკა" არის არასამთავრობო ორგანიზაციის "კოალიცია დამოუკიდებელი ცხოვრებისათვის" ერთ-ერთი დამფუძნებელი და აქტიური წევრი, რომელიც საქართველოში შეზღუდული შესაძლებლობის მქონე ადამიანების სამოქალაქო ინტერესებს და უფლებებს იცავს.
გამოფენის ორგანიზატორია: ასოციაცია „ანიკა" და აპ. ქუთათელაძის სახელობის სახელმწიფო სამხატვრო აკადემია, ხოლო მხარდამჭერი საქართველოს კულტურისა და ძეგლთა დაცვის სამინისტრო.