საქართველოს განათლებისა და მეცნიერების სამინისტრო საგანმანათლებლო რესურსცენტრების დონეზე რეორგანიზაციას განახორციელებს. ამ სიახლესთან დაკავშირებით მინისტრის მოადგილემ, ალუდა გოგლიჩიძემ ბრიფინგი, გამართა.
გოგლიჩიძის განცხადებით, ზოგად განათლებაში ყველაზე სტრატეგიულ პრიორიტეტად სამინისტრო სკოლაში ხარისხიანი განათლების ხელმისაწვდომობას მიიჩნევს. ამ პრიორიტეტიდან გამომდინარე, მნიშვნელოვანია სისტემაში ამოქმედდეს სწავლა-სწავლების პროცესის ხარისხის მონიტორინგისა და შეფასების სისტემა. სამინისტროს გადაწყვეტილებით, რესურსცენტრების ფუნქცია-მოვალეობები შეიცვლება და სწორედ საგანმანათლებლო რესურსცენტრი იქნება ის რგოლი, რომელიც სკოლაში სწავლა-სწავლების პროცესს გაუწევს მონიტორინგს.
ზემოაღნიშნული პრიორიტეტის გათვალისწინებით, გადაიხედება რესურსცენტრების დანიშნულება, გამოცხადდება კონკურსი და რესურსცენტერები კონკურსის წესით შერჩეული კადრებით დაკომპლექტდება.
საქართველოს განათლებისა და მეცნიერების სამინისტრო კონკურსისთვის მზადების პერიოდში, საზოგადოებას რეგულარულად მიაწვდის ინფორმაციას განხორციელებული ქმედებების თაობაზე და იმ საჭიროებებზე, რაც ამ პერიოდში გამოიკვეთება. ვინაიდან პროცესი იქნება გამჭვირვალე, სამინისტრო იმედს გამოთქვამს, რომ მასში ყველა დაინტერესებული მხარე, კომპეტენტური სტრუქტურები და ორგანიზაციები ჩაერთვებიან.