სამი ქართველი მხატვრის - ირაკლი ფარჯიანის, მერაბ აბრამიშვილისა და კოტე სულაბერიძის ნამუშევრებს სოტბის აუქციონის გამოფენაზე-გაყიდვაზე გაიტანენ. როგორც "ჯი-ეიჩ-ენს" "ბაია გალერეადან" აცნობეს, 2013 წლის 4 - 12 მარტს, ლონდონში, სოტბის აუქციონის გალერეაში გაიმართება კავკასიის და ცენტრალური აზიის თანამედროვე ხელოვნების ნიმუშების გამოფენა - გაყიდვა, სახელწოდებით "გზაჯვარედინზე" (საქართველო,
აზერბაიჯანი, სომხეთი, ყირგიზეთი, ყაზახეთი, უზბეკეთი) გამოფენაზე წარმოდგენილი იქნება ამ რეგიონების სახვითი და ვიზუალური ხელოვნება 1960 -იანი წლებიდან დღემდე. გამოიცემა კატალოგი, დაგეგმილია საინფორმაციო პროგრამა.
"ბაია გალერეა" ამ გამოფენაზე წარადგენს სამ მხატვარს: ირაკლი ფარჯიანს, მერაბ აბრამიშვილს, კოტე სულაბერიძეს.
2012 წლის 8 - 12 დეკემბერს ბაია გალერეის საგამოფენო დარბაზში (თბილისი, შარდენის ქ.#10) შეგიძლიათ დაათვალიეროთ ის სამი ნამუშევარი, რომელიც მარტში ექსპონირებული იქნება ლონდონში, სოტბის გალერეაში (34-35 NEW BOND STR.), გამოფენაზე "გზაჯვარედინი".
პროექტი მნიშვნელოვანია იმ თვალსაზრისით, რომ ეს არის საქართველოს პირველი რეგიონალური მონაწილეობა სოტბის აუქციონის გამოფენაზე. (კიდევ ერთხელ ვაზუსტებთ, რომ ეს არ არის აუქციონი, არამედ გამოფენა-გაყიდვა, რომელსაც მართავს სოტბის აუქციონი).