კომპანია ჯეოფეშენის ორგანიზებით, 14-16 დეკემბერს, რიგით მეშვიდე თბილისის მოდის კვირეული გაიმართება. 3 დღიანი წინა საახალწლო ღონისძიება სასტუმრო „Holiday Inn"-ში და მის მიმდებარე ტერიტორიაზე გაიმართება. ღია ცის ქვეშ განლაგებული დიდი ტენტი კი დამატებით ხიბლს შესძენს შექმნილ გარემოს.
ჯამურად, ამ სეზონზე თბილისის მოდის კვირეულზე 10-მდე დიზაინერი წარადგენს თავის კოლექციას: გიორგი შაღაშვილი, უტა ბექაია, ეკა ბალანჩივაძე, ნინო ბაბუხადია (პირველად მონაწილეობს), აკა ნანიტაშვილი, ქეთი ჩხიკვაძე და ავთანდილ ცქვიტინიძე. გამომდინარე იქიდან, რომ ღონისძიება წინა საახალწლოა, ცვლილებებიც არის მოსალოდნელი და შესაძლოა სია კიდევ გაიზარდოს. დიზაინერებს, კასტინგის შედეგად შერჩეული სხვა და სხვა სააგენტოს 26 მოდელი მოემსახურება.
14 დეკემბერს, თბილისის მოდის კვირეული დიზაინერ თამუნა ინგოროყვას კოლექციის ჩვენებით გაიხსნება. ამჯერად კვირეულის შემოქმედებით ნაწილზე ნინო იოსელიანი ზრუნავს, რომლის მხარდაჭერით ყველა საღამო განსაკუთრებულად იქნება შეფუთული.