აზერბაიჯანში განაჩენი გამოუტანეს დაჯგუფებას, რომელიც, ხელისუფლების მტკიცებით, ბაქოში, "ევროვიზია-2012"-ის დროს ტერაქტების სერიის მოწყობას გეგმავდა. ამის შესახებ ადგილობრივი მედია იუწყება. ოთხ ბრალდებულს თავისუფლების აღკვეთა 13-დან 14 წლამდე ვადით განესაზღვრა.
"ევროვიზია 2012" ბაქოში მიმდინარე წლის მაისში ჩატარდა. კონკურსის პერიოდში ეროვნული უსაფრთხოების სამინისტრომ დედაქალაქსა და ქვეყნის ზოგიერთ რაიოდნში სპეცოპერაციები ჩაატარა, რის შედეგადაც ეჭვმიტანილები დააკავეს. სამართალდამცველების განცხადებით, პირთა ჯგუფი ტერაქტებს გეგმავდა, რომელიც კონკურსის სტუმრების წინააღმდეგ იქნებოდა მიმართული. ასევე, მზადდებოდა ტერაქტი ილჰამ ალიევის წინააღმდეგაც.
ხელისუფლების განცხადებით, ტერორისტების მიზანი ქაოსის და ანარქიის გამოწვევა და მოსახლეობის შეშინება იყო. მათ, ასევე, სურდათ აზერბაიჯანის საერთაშორისო იმიჯის შელახვა. გარკვეული გარემოებების მიხედვით ირკვევა, რომ დაკავებულებს, შესაძლოა, კავშირის ირანულ სპეცსამსახურებთან ჰქონდათ, თუმცა, ირანის საელჩო აზერბაიჯანში ამ ეჭვს კატეგორიულად უარყოფს.