აჭარის მთავრობის ხელმძღვანელმა მთავრობის ახალი შემადგენლობით პირველი სხდომა გამართა. სხდომაზე აჭარის ჯანმრთელობისა და სოციალური დაცვის მინისტრის ინიციატივით, სხვადასხვა პროგრამის განხორციელებისას მომართვიანობის გაზრდის გამო, ბიუჯეტში ცვლილებები შევიდა. არსებული ასიგნებებით 125 ათასი ლარი, მოსახლეობისთვის განსაკუთრებულ შემთხვევებში სამედიცინო დახმარების პროგრამასა და გეგმური ჰოსპიტალური მომსახურების კომპონენტზე გადანაწილდება.
მთავრობის კიდევ ერთი გადაწყვეტილებით, განათლების სამინისტროს დაქვემდებარებაში არსებული საჯარო სამართლის იურიდიული პირების მოადგილეებს, მინისტრის ნაცვლად, მთავრობის თავმჯდომარე დანიშნავს.
ფინანსთა მინისტრმა გიორგი თავართქილაძემ მთავრობის სხდომაზე, რეგიონში არსებული საინვესტიციო პოლიტიკა მიმოიხილა. მისი განცხადებით, ინვესტორები ვადების დარღვევის შემთხვევაში დაჯარიმდებიან, არაგონივრულ ვადებში აღებული ხელშეკრულებები კი გაუქმდება. ცვლილებები შევიდა აჭარის ტელერადიოდეპარტამენტის ბიუჯეტშიც.