. დღეს აფხაზეთის ჯანდაცვის მინისტრმა დალილა ხორავამ და ACTS Georgia -ს ვიცე-პრეზიდენტმა საქართველოში გურამ ამერიძემ ურთიერთთანამშრომლობის მემორანდუმს მოაწერეს ხელი.
ACTS International პირველი ამერიკული არასამთავრობო ორგანიზაციაა, რომელმაც საქართველოში თავისი მისიის განხორციელება დაიწყო. ACTS Georgia ACTS International დაქვემდებარებაში მყოფი ორგანიზაციაა, რომელიც 1992 წლიდან დღემდე ჰუმანიტარული და სამედიცინო დანიშნულების ტექნიკური აღჭურვილობის დახმარების კუთხით ფართო საქმიანობას ეწევა.
ორგანიზაცია აფხაზეთის ჯანდაცვის სამინისტროსთან ოთხი წელია თანამშრომლობს. ამ ხნის მანძილზე აფხაზეთიდან დევნილმა მოსახლეობამ და დევნილთა სამედიცინო დაწესებულებებმა ორგანიზაციისაგან ჰუმანიტარული დახმარების სახით სხვადასხვა დასახელების მედიკამენტები მიიღეს.
ორგანიზაცია უახლოეს მომავალში აფხაზეთიდან დევნილი მოსახლეობის დასახმარებლად ჰუმანიტარული დახმარების გამოყოფას გეგმავს.
შეხვედრა 9 თებერვალს, 11:00 საათზე, აფხაზეთის შრომის, ჯანმრთელობისა და სოციალური დაცვის სამინისტროში გაიმართა.
