პარლამენტი მიმდინარე სასესიო კვირას საქსტატის საბჭოს წევრების კანდიდატებს დაამტკიცებს. პრეზიდენტმა პარლამენტს საბჭოს წევრების კანდიდატებად ზაზა ჭელიძე, ვაჟა ნადარეიშვილი, ნოდარ კაპანაძე, გია ჯანდიერი, ამირან ბაბუნაშვილი, მერაბ ხიმშიაშვილი, ვახტანგ მეგრელიშვილი და ქეთევან მარშავა წარუდგინეს.
კანონის თანახმად, აღნიშნული 8 კანდიდატიდან პარლამენტმა საბჭოს წევრად 5 მათგანი უნდა დაამტკიცოს. "ოფიციალური სტატისტიკის შესახებ" კანონის თანახმად, საბჭო 7 წევრისა და თავმჯდომარისგან დაკომპლექტდება, თუმცა პარლამენტი ამტკიცებს მხოლოდ 7 წევრს. საბჭოს თვამჯდომარე კი ამავდროულად "საქსტატის აღმასრულებელი დირექტორიცაა, რომელსაც თანამებობაზე ნიშნავს და ათავისუფლებს პრეზიდენტი. მას თანამდებობაზე ყოფნა 4 წლის ვადით შეუძლია. რაც შეეხება საბჭოს შემადგენლობას, საბჭოს სამი წევრიდან ერთი უნდა იყოს ეროვნული ბანკის წარმომადგენელი, ერთი ეკონომიკის სამინისტოს, ხოლო ერთიც ფინანსთა სამინისტროს წარმომადგენელი. რაც შეეხება იმ 5 წევრს, რომელსაც პარლამენტი ამტკიცებს, აქედან არც ერთი არ უნდა იყოს საჯარო მოხელე.
შეგახსენებთ, რომ საქსტატის შესახებ კანონი ძალაში 1-ლი თებერვლიდან შევიდა. მის თანახმად, აღნიშნული უწყება ხდება დამოუკიდებელი და აღარ იქნება ეკონომიკის სამინისტროს დაქვემდებარებული ორგანო, თუმცა იქნება მთავრობის დაქვემდებარებაში მყოფი. კანონის თანახმად, საბჭოს წევრებს პარლამენტი წარდგენიდან 21 დღის ვადაში ამტკიცებს, თუმცა პარლამენტის გადაწყვეტილებით კანდიდატები მიმდინარე სასესიო კვირას დამტკიცდება. პრეზიდენტმა კანდიდატები პარლამენტს დღეს წარუდგინა.
რაც შეეხება წარდგენილ კანდიდატებს, ზაზა ჭელიძე ფინანსთა მინისტრის მოადგილე იყო, ამKამჟამად კი სტატისტიკის სამსახურის აღმასრულებელი დირექტორის მოვალეობის შემსრულებელია. ვაჟა ნადირაძე 2008 წლიდან დღემდე საერთაშორისო საფინანსო კორპორაციის კვლევების კოორდინატორია. ნოდარ კაპანაძე მუშაობდა გაეროს განვითარების პროგრამის და ფონდ "ღია საზოგადოება საქართველოს" კონსულტანტად. გია ჯანდიერი ახალგაზრდა ეკონომისტთა ასოციაციის და ახალგაზრდა იურისტთა კლუბის დამფიუძნებელია, ამჟამად კი კითხულობს ლექციებს ფინანსებსა და ტრანსპორტის ეკონომიკაში. ამირან ბაბუნაშვილი 2007 წლიდან დღემდე ჟურნალ "ბიზნესის: ადამიანები, მეთოდები, სტრატეგიები" მთავარი რედაქტორია, ხოლო გამომცემლება "ბიზნეს ფაბლიშინგის" დირექტორი; მერაბ ხიმშიაშვილი 2005-2009 წლებში მუშაობდა აჭარის ავტონომიური რესპუბლიკის ფინანსთა და ეკონომიკის სამინისტროს სტატისტიკის დეპარტამენტის უფროსად; ვახტანგ მეგრელიშვილი 2001 - 2003 წლებში იყო ექიმთა და პაციენტთა უფლებების დაცვის კავშირის თავმჯდომარე და საერთაშორისო პროექტების კონსულტანტი; ქეთევან მარშავა კი თსუ-ის აკადემიური საბჭოს წევრია.