"უშიშროების სამინისტროს შექმნაზე მსჯელობა ჯერჯერობით არ ყოფილა", - განაცხადა ჟურნალისტებთან იუსტიციის მინისტრობის კანდიდატმა თია წულუკიანმა.
მისი განცხადებით, გადაწყვეტილებას უშიშროების სამინისტროს შექმნასთან დაკავშირებით გუნდურად მიიღებენ.
"უშიშროების სამინისტროს შექმნაზე მსჯელობა ჯერჯერობით არ ყოფილა. ამისთვის აუცილებელია, შეიკრიბოს პარლამენტი, დამტკიცდეს მთავრობა, მაგრამ ეს ის თემაა, რომელიც ჩემი მომავალი უწყების კომპეტენციას სცილდება. ისიც არ არის დასამალი, რომ როცა პროგრამულ მიმართულებებზე ვსაუბრობდით, სერიოზული მსჯელობა იყო იმასთან დაკავშირებით, სჭირდება თუ არა საქართველოს ერთი მინისტრის ქვეშ მყოფი მონსტრი, რასაც შს სამინისტრო და უშიშროება ჰქვია. ამაზე იმსჯელებენ შესაბამისი სამინისტროს წარმომადგენლები. შს მინისტრიც, ალბათ, ამ ვარიანტს განიხილავს და შემდეგ გუნდი მთლიანად ვიმსჯელებთ", - განაცხადა წულუკიანმა.
