უკრაინამ რუსეთში საჰაერო სივრცის ბლოკირება დაიწყო. კამპანია, რომელიც რუსეთის საჰაერო სივრცეში ავიამიმოსვლის შეფერხებას ისახავს მიზნად, მოსკოვიდან დაიწყო. რუსეთის დედაქალაქის აეროპორტებში ასობით რეისი გადაიდო ან გაუქმდა. ამის შესახებ უკრაინული მედია Telegram-არხებზე დაყრდნობით იუწყება.
Telegram-არხ Ukraine contex-ის ცნობით, რუსეთის საჰაერო სივრცის შეზღუდვის შესახებ ადრე დაანონსებული კამპანია დაგეგმილზე მცირედი დაგვიანებით დაიწყო.
„თუმცა ამისთვის სერიოზული მიზეზები არსებობდა და ზოგიერთი პარტნიორის თხოვნაც გავითვალისწინეთ“, - ნათქვამია ინფორმაციაში.
9 ოქტომბრის მონაცემებით, მოსკოვის აეროპორტებში რეისების შეფერხება და გაუქმება მართლაც მასშტაბური იყო: 62 რეისი გაუქმდა, 370-ზე მეტი კი გადაიდო.
რუსეთის დედაქალაქ მოსკოვსა და მოსკოვის ოლქზე დრონებითა და მცირე ზომის საჰაერო ბუშტებით თავდასხმის შესახებ ვრცელდება ინფორმაცია. ამის შესახებ რუსული ოპოზიციური Telegram-არხი ASTRA წერს.
მოსკოვის სამხრეთ რაიონებიდან რუსეთის საჰაერო თავდაცვის სისტემების მოქმედების შესახებ იუწყებიან. კაპოტნიას, კუზმინკის, ლიუბლინოს, მარინოს, ცარიცინოს, ჩერტანოვოს, ორეხოვო-ბორისოვოს, ტექსტილშჩიკისა და ნაგატინსკი ზატონის მცხოვრებლები აფეთქებების ხმების შესახებ წერენ.
რუსეთის ფედერალური საჰაერო ტრანსპორტის სააგენტოს, „როსავიაციის“ ცნობით, მოსკოვის ოთხ აეროპორტში- ვნუკოვოში, დომოდედოვოში, ჟუკოვსკისა და შერემეტიევოში „ხალიჩის“ გეგმა ამოქმედდა. ეს პროცედურა საჰაერო სივრცეში საფრთხის არსებობისას ფრენების შეზღუდვას ითვალისწინებს.
ამასთან, რუსულ სოციალურ ქსელებში გავრცელებული ცნობების თანახმად, მოსკოვის აეროპორტებში 200-ზე მეტი რეისი გადაიდო, 200-ზე მეტი კი გაუქმდა.
უკრაინული მედია წერს, რომ აღნიშნული დრონების საფრთხის გამო დაწესებულ შეზღუდვებს უკავშირდება. კერძოდ, ადგილობრივი დროით შუაღამიდან შეზღუდვები მოქმედებდა ვნუკოვოს, დომოდედოვოსა და ჟუკოვსკის აეროპორტებში. თავდაპირველად, შეზღუდვების მოქმედება დილის 7:00 საათამდე იყო გათვალისწინებული.
დღის განმავლობაში მოსკოვის ზოგიერთ აეროპორტში შეზღუდვები ხელახლა დაწესდა. 15:40 საათიდან კი ოთხივე აეროპორტმა, მათ შორის შერემეტიევომაც, თვითმფრინავების მიღება კვლავ შეწყვიტა.
უკრაინის პრეზიდენტმა ვოლოდიმირ ზელენსკიმ სექტემბერში ავიაკომპანიები და სადაზღვევო კომპანიები გააფრთხილა, რომ რუსეთის საჰაერო სივრცე სულ უფრო სახიფათო ხდებოდა უკრაინული დრონების მოქმედების გამო.
