თელავის რაიონულ საავადმყოფოში თელავის სოფლებიდან სტიქიის შედეგად დაშავებული 13 ადამიანი გადაიყვანეს. როგორც კახეთის საინფორმაციო ცენტრს საავადმყოფოს დირექტორის მოადგილემ დოდო ომსარაშვილმა განუცხადა, დაზარალებულებს ძირითადად მინისგან მიყენებული ჭრილობები აღენიშნებოდათ.
„დილის 5:00 საათიდან დაიწყო სტიქიის შედეგად დაზარალებულების შემოყვანა და ამ დრომდე 13 პაციენტი მივიღეთ. ყველა მათგანს ჭრილობები აღენიშნებოდა, თუმცა სერიოზული დაზიანებები არ ყოფილა. ჭრილობები დავუმუშავეთ და სახლში გავწერეთ. ამ დროისთვის საავადმყოფოში 1 პაციენტი რჩება, რომელსაც ფეხზე, ქუსლის არეში დიდი ჭრილობა აქვს," - განუცხადა დოდო ომსარაშვილმა კახეთის საინფორმაციო ცენტრს.
შეგახსენებთ, რომ დღეს, გამთენიისას გრიგალის და ძლიერი სეტყვის შედეგად გურჯაანის, თელავის და ლაგოდეხის რაიონებში რამდენიმე ათასი ოჯახი დაზარალდა. საცხოვრებელ სახლებს გადახდილი აქვს სახურავები, ჩამონგრეულია კედლები, დატბორილია რამდენიმე ასეული სახლი. სოფლებში 100%-ით არის განადგურებული მოსავალი, დახოცილია შინაური ფრინველი და პირუტყვი. დაგლეჯილია მრავალწლიანი ხეები, დაზიანებულია მანქანები, ჩახერგილია გზები, დაწყვეტილია ელექტროენერგიის მავთულები.
