დღეს, 9 ივნისს, 10:30 საათზე, გარემოს დაცვის დღისადმი მიძღვნილი კვირეულის ფარგლებში ველორბოლა გაიმართება, რომელსაც გარემოს დაცვის მინისტრი გოგა ხაჩიძე დაესწრება.
ველორბოლა თბილისის ზღვაზე ვარკეთილიდან თემქის მიმართულებით გაიმართება და 20 კილომეტრს მოიცავს. მონაწილეობის მისაღებად 100-მდე მსურველი დარეგისტრირდა. გამარჯვებულები გამოვლინდებიან კატეგორიების მიხედვით და დაჯილდოვდებიან სპეციალური პრიზებითა და მედლებით.
ღონისძიება გარემოს დაცვის მსოფლიო დღისადმი (5 ივნისი) მიძღვნილი კვირეულისა და საქართველოს მთავრობის ანტინარკოტიკული კამპანიის ფარგლებში იმართება. ანტინარკოტიკულ კამპანიაში ჩართულია საქართველოს პროკურატურა, გარემოს დაცვის სამინისტრო, ჯანმრთელობისა და სოციალური დაცვის, განათლებისა და მეცნიერების სამინისტროები და ქ. თბილისის მერია. ღონისძიების მიზანია, ხელი შეუწყოს მოსახლეობის ჯანსაღი ცხოვრების სტილის პროპაგანდას, ეკოლოგიურად სუფთა ტრანსპორტის პოპულარიზაციას და ამ მხრივ ჰაერის დაბინძურების შემცირებას.
გარემოს დაცვის მსოფლიო დღე ყოველ წელს 5 ივნისს მთელ მსოფლიოში და მათ შორის საქართველოშიც მასშტაბურად სხვადასხვა სახის ღონისძიებებით აღინიშნება. ველორბოლა გერმანიის საერთაშორისო თანამშრომლობის საზოგადოების ფინანსური მხარდაჭერით გაიმართება.
