ვიცე-პრემიერმინისტრი გიორგი ბარამიძე სამუშაო ვიზიტით კიევში იმყოფება, სადაც უკრაინის ვიცე-პრემიერ სერგეი ტიგიპკოსთან ერთან საქართველო-უკრაინის ბიზნესფორუმი გახსნა.
ფორუმში მონაწილე ქართველმა და უკრაინელმა ბიზნესმენებმა განიხილეს ორ ქვეყანას შორის ახალი ბიზნესინიციატივების განხორციელების, ინვესტიციების მოზიდვისა და ტურისტულ სფეროში ურთიერთობების გაღრმავების საკითხები, ასევე სოფლის მეურნეობის, ენერგეტიკისა და სხვა სფეროებში ორმხრივი და მრავალმხრივი ურთიერთობების განვითარების პერსპექტივები, რაც ხელს შეუწყობს ქვეყანაში დამატებითი სამუშაო ადგილების შექმნასა და სოციალური პრობლემების მოგვარებას.
ბიზნესფორუმზე სიტყვით გამოსვლისას გიორგი ბარამიძემ ისაუბრა საქართველოს მიერ განხორციელებულ წარმატებულ რეფორმებზე კორუფციასთან ბრძოლის, პოლიციის, საბაჟო, საგადასახადო და სხვა სფეროებში, საქართველო-უკრაინას შორის ეკონომიკური თანამშრომლობის განვითარების მნიშვნელობაზე როგორც სახელისუფლებო, ასევე ბიზნესმენების დონეზე, რაც ორ ქვეყანას შორის სტრატეგიულ პარტნიორობას კიდევ უფრო განამტკიცებს.
