თბილისის საკრებულოს "ქრისტიან-დემოკრატმა" დეპუტატმა ზაზა გაბუნიამ საკრებულოში პრესკონფერენცია გამართა, რომელზეც მთავრობის ახალი ინიციატივის შესახებ ისაუბრა, რომლის თანახმად 2012 წლის 1 მაისიდან ამოქმედდება კერძო სამართლის იურიდიული პირი, რომლის მიზანი ქვეყნის მასშტაბით დასუფთავების სერვისის განხორციელება იქნება. აღნიშნულ საჯარო სამართლის იურიდიული პირი მართვის 100%-იანი უფლებით ცენტრალური მთავრობის, კერძოდ კი ინფრასტრუქტურის სამინისტროს დაქვემდებარებაში გადადის.
ზაზა გაბუნიას განცხადებით, ეს გადაწყვეტილება აკნინებს ადგილობრივი თვითმმართველობის როლს. თავად გადაწყვეტილებას კი არა აქვს ანალოგი და პრეცედენტი მსოფლიოს არცერთ ქვეყანაში, რადგან დასუფთავების სერვისის განხორციელება არსად არ არის ფედერალური მთავრობის საქმე.
"ფუნქციების ამგვარი ცენტრალიზაცია კიდევ უფრო შორეულ პერსპექტივად ხდის დეცენტრალიზაციის იდეას, რაც ეჭვქვეშ აყენებს თავად წარმომადგენლობითი დემოკრატიის და ადგილზე გადაწყვეტილებების მიღების შესაძლებლობას, რომლის გარეშე არ არსებობს თავად დემოკრატია", - განაცხადა გაბუნიამ.
დეპუტატის თქმით, ინფრასტრუქტურის სამინისტროს შესაძლებელია ჰქონდეს კოორდინატორის და ხიდის ფუნქცია ცენტრალურ და ადგილობრივ ხელისუფლებებს შორის, მაგრამ დაუშვებელია იგი გახდეს მაკონტროლებელი იმ ძირითადი ფუნქციებისა, რაც მუნიციპალიტეტებისთვის არის განკუთვნილი.
