ქართულენოვანი Forbes-ის მთავარი რედაქტორი რეზო საყევარიშვილია, რომელიც დარწმუნებულია, რომ ჟურნალს ბიზნესმენების გარდა ბევრი სხვა სფეროს ადამიანებიც წაიკითხავენ.

" Forbes-ის საგამომცემლო სახლი ქართული ბაზრით, ქართული ბიზნეს ბიზნეს-ეკონომიკური მოვლენებით დაინტერესდა. იმავდროულად, საქართველოშიც გამოჩნდნენ კომპანიები და ადამიანები, რომლებმაც ჩათვალეს საჭიროდ Forbes-ი ქართულ ბაზარზეც გამოსულიყო. ჩვენთვის მნიშვნელოვანია, რომ ასეთი დიდი დონის, მნიშვნელოვანია მედია-ბრენდი საქართველოში შემოვიდა. ჟურნალის ღირებულება 10 ლარი იქნება და ძირითადი მისი სამიზნე აუდიტორია ბიზნესმენებია, ესენი იქნებიან ადამიანები რომლებიც ფლობენ საკუთარ ბიზნესებს და იღებენ გადაწყვეტილებებს ბიზნესპროცესებთან დაკავშირებით. Forbes-ი ძირითადად ნიშური პროდუქტია, თუმცა ეს არ უშლის ხელს, რომ დაინტერესებული ადამიანები ჟურნალს გაეცნონ"- განაცხადა Forbes-ის მთავარმა რედაქტორმა რეზო საყევარიშვილმა.
Forbes-ის ქართული ვერსია საუკუნოვანი ისტორიის მქონე ჟურნალის რიგით მეოცე საერთაშორისო გამოცემაა. მისი შემოსვლა ქართულ ბაზარზე განპირობებულია იმ მნიშვნელოვანი ცვლილებებით, რომლებიც საქართველოში განხორციელდა და რწმენით, რომ ჩვენს ქვეყანას აქვს საკმარისი პოტენციალი, იყოს წარმატებული - ძლიერი ეკონომიკით, ნოვატორი ბიზნესმენებით, ღირებული იდეებით, თანამედროვე ტექნოლოგიებით, რაც ასე ფასეულია Forbes-ისთვის.
Forbes Georgia ყოველთვიური გამოცემაა, 3-ათასიანი ტირაჟით. ჟურნალის მთავარი იდეოლოგიაა - მოიძიოს და მკითხველს მოუთხროს ადამიანებზე, იდეებსა და ტექნოლოგიებზე, რომლებიც ცვლიან სამყაროს. იგი ქართველ მკითხველს მიაწოდებს საუკეთესოს, რაც Forbes-ის ამერიკულ და სხვა საერთაშორისო გამოცემებში იქმნება და ფასეულია წარმატებასა და წინსვლაზე ორიენტირებული ყველა ქვეყნის, კომპანიის, ბიზნესმენისა თუ ცალკეული ადამიანისთვის.
ამავდროულად Forbes Georgia-ს მიზანია, საზოგადოებას გააცნოს ქართული ბიზნესისა და ეკონომიკის მიღწევები, ცალკეული მეწარმეების, ბიზნესმენებისა და სხვა პროფესიის წარმომადგენელთა წარმატების ისტორიები.
ჟურნალის პარალელურად, შესაძლებელია ინფორმაციის მიღება ყოველდღიურად განახლებადი ვებგვერდიდანაც (www.forbesgeorgia.ge).
საგამომცემლო სახლი Media Partners, JSC ათ წელზე მეტია, რაც კავკასიისა და შუა აზიის რეგიონში მუშაობს. საერთაშორისო მედიაკომპანიებთან თანამშრომლობით Media Partners უკვე მომავალ წელს ახალ საერთაშორისო გამოცემას წარუდგენს ქართველ მკითხველს.
Forbes Media, LLC აერთიანებს ჟურნალ Forbes-სა და Forbes.com-ს - უმსხვილეს ბიზნესპორტალს ეკონომიკისა და ფინანსების შესახებ, თვეში 18-მილიონიანი აუდიტორიით. იგი აგრეთვე გამოსცემს ჟურნალებს Forbes Life, Forbes Woman და Forbes Asia, რომლებიც 6 მილიონ მკითხველს იზიდავს. ლიცენზიის საფუძველზე Forbes 20 სხვადასხვა ენაზე გამოიცემა. არსებობს ადგილობრივი გამოცემები აფრიკაში, ჩინეთში, ხორვატიაში, ჩეხეთის რესპუბლიკაში, ბულგარეთში, ინდოეთში, ინდონეზიაში, ისრაელში, კორეაში, ლატვიაში, ახლო აღმოსავლეთის ქვეყნებში, პოლონეთში, რუმინეთში, რუსეთში, სლოვაკეთში, თურქეთსა და უკრაინაში.