რომიდან თბილისის მიმართულებით, იტალიის უმსხვილესი ავია გადამზიდავი - "ალიტალია" იფრენს, რომელიც რეგულარული რეისების შესრულებას ზაფხულის სეზონიდან იწყებს. იტალიური ავიაკომპანია ქართულ ბაზარზე, "ალიტალიასა" და ‘ტავ ჯორჯიას' შორის მოლაპარაკებების შემდეგ გადაწყდა.
იტალიის უდიდესი და მსოფლიოს სიდიდით მე-19 ავიაკომპანია რეისებს კვირაში ორჯერ შეასრულებს, ხოლო ბილეთის ღირებულება მომდევნო თვეების განმავლობაში დაზუსტდება.
"რომი-თბილისის პირდაპირი რეისი არა მარტო სავაჭრო-კომერციულ კავშირს გაამყარებს ორ ქვეყანას შორის, არამედ ქართველ მგზავრებს შესაძლებლობას გაუზრდის იმოგზაურონ მსოფლიოს მრავალი ქვეყნის მიმართულებით. ქართულ ავიაბაზარზე ყოველი ახალი ავიაკომპანიის შემოსვლა ტურიზმის განვითარებისკენ გადადგმული კიდევ ერთი ნაბიჯია, რასაც ტავ ჯორჯია ყოველთვის სიხარულით მიესალმება. კეთილი იყოს ‘ალიტალიას' შემოსვლა საქართველოში!"- განაცხადა "ტავ ჯორჯიას" გენერალურმა მენეჯერმა მეთე ერქალმა.
აქამდე, იტალიის მიმართულებით ფრენა მხოლოდ მესამე ქვეყნის აეროპორტის გავლით, ტრანზიტულად იყო შესაძლებელი.
როგორც ცნობილია, 150 თვითმფრინავის შემადგენლობის ავია პარკით „ალიტალია" ახორციელებს 28 შიდა და 62 საერთაშორისო რეისს და ოპერირებს მსოფლიოს 41 ქვეყანაში ( 2011 წლის ნოემბრის მონაცემებით), რომელთა რიცხვს მალე საქართველოც შეემატება.
ბოლო ერთი წლის განმავლობაში ქართულ ავია ბაზარზე არა ერთი ავიაკომპანა შემოვიდა, როგორიცაა - „ ეარ ასტანა", „ჩინეთის სამხრეთ ავიახაზები", „ურალის ავიახაზები", „ტაბანის ავიახაზები", „ფლაი დუბაი", „ეარ კარგო", 2012 წლის თებერვლიდან „კატარის ავიახაზები" იწყებს ოპერირებას და ამ სიას უახლოეს მომავალში „ალიტალია"დაემატება.