21 ნოემბერს, სასტუმრო "შერატონ მეტეხი პალასში", 16:00 საათზე, ბიზნესომბუდსმენის ვებ-გვერდის პრეზენტაცია გაიმართება.
ბიზნესომბუდსმენის ოფიციალური გვერდი http://www.businessombudsman.ge/ რამდენიმე დღის უკან გაეშვა და შესაძლებლობას იძლევა ბიზნეს სექტორმა უშუალოდ იკონტაქტოს ბიზნესომბუდსმენთან.
როგორც ცნობილია ბიზნესომბუდსმენი ზედამხედველობას უწევს საქართველოს ტერიტორიაზე გადასახადის გადამხდელთა უფლებებისა და კანონიერი ინტერესების დაცვას; ავლენს მათი დარღვევის ფაქტებს, ხელს უწყობს დარღვეული უფლებების აღდგენას; განიხილავს პირთა განცხადებებსა და საჩივრებს, რომლებიც შეეხება საგადასახადო და სხვა სახელმწიფო ორგანოების მიერ გადასახადის გადამხდელთა უფლებების დარღვევის ფაქტებს; მას უფლება აქვს, სახელმწიფო ორგანოდან მიიღოს განმარტება გადასახადის გადამხდელის განცხადებასთან ან/და საჩივართან დაკავშირებულ საკითხზე;
გადასახადის გადამხდელის უფლებების დარღვევის ფაქტის გამოვლენის შემთხვევაში ბიზნესომბუდსმენი მიმართავს შესაბამის ორგანოს და აძლევს რეკომენდაციას ამ უფლებების აღდგენის ღონისძიებათა განხორციელების შესახებ;
ბიზნესომბუდსმენს უფლება აქვს, არ გასცეს ინფორმაცია იმ ფაქტზე, რომელიც გაანდეს, როგორც გადასახადის გადამხდელთა უფლებების დამცველს.
ომბუდსმენი პარლამენტის საფინანსო-საბიუჯეტო კომიტეტს წელიწადში ერთხელ წარუდგენს ანგარიშს გადასახადის გადამხდელთა უფლებების დაცვის მდგომარეობის შესახებ. ანგარიში უნდა შეიცავდეს ქვეყანაში გადასახადის გადამხდელთა უფლებებისა და თავისუფლებების უზრუნველყოფის ზოგად შეფასებებს, დასკვნებსა და რეკომენდაციებს.
ბიზნეს ომბუდსმენის ინსტიტუტი შეიქმნა საქართველოს 2011 წლის საგადასახადო კოდექსით. ომბუდსმენის უფლებამოსილება, მისი საქმიანობის ძირითადი პრინციპები და ფორმები განისაზღვრება საქართველოს მთავრობის 2011 წლის 23 თებერვლის #92 დადგენილებით. ომბუდსმენს ნიშნავს საქართველოს პრემიერ-მინისტრი საქართველოს პარლამენტის თავმჯდომარესთან შეთანხმებით.