საქართველოზე შესაძლოა ახალმა გაზსადენმა გაიაროს. აღნიშნული ინფორმაცია "აზერბაიჯანის სახელმწიფო ნავთობკომპანიის" წარმომადგენელმა ვაგიფ ალიევმა გაავრცელა.
მისი თქმით, საქართველოზე, შესაძლოა, ახალმა მილსადენმა გაიაროს, რომლითაც აზერბაიჯანული გაზის თურქეთში ტრანსპორტირება მოხდება.
ალიევის განმარტებით, განიხილება ახალი გაზსადენის მშენებლობა, ან არსებული "ბაქო-თბილისი-ერზრუმის" გაზსადენის გაფართოება. მისი თქმით, პროექტში შესაძლოა ის კომპანიებიც ჩაერთონ, რომლებიც "შაჰ-დენიზის" კონსროციუმში არიან გაერთიანებულნი.
პროექტის განხორციელება კი ტექნიკურ-ეკონომიკურ დასაბუთებაზეა დამოკიდებული, რომელიც ამ დროისათვის ჯერ არ არსებობს.
პროექტის განხორციელების შემთხვევაში კი აზერბაიჯანიდან თურქეთში საქართველოს გავლით 16 მლრდ. კუბ/მ და უფრო მეტი ბუნებრივი აირის ტრანსპორტირება გახდება შესაძლებელი. სავარაუდოდ გაზსადენი აზერბაიჯანს საქართველოს გავლით სამხრეთ თურქეთთან დააკავშირებს, საიდანაც გაზი შემდგომ ბულგარეთსა და საბერძნეთისკენ გადაიქაჩება.
