შემოსავლების სამსახურის ინიციატივით და კოდექსში შესული ცვლილებების მიხედვით, უბნის საგადასახადო ოფიცრები ამიერიდან მეწარმეებს დარღვევის აღმოჩენის შემთხვევაში გააფრთხილებენ და გარკვეულ ვადას მისცემენ. კოდექსში შესული ცვლილებების თანახმად, ამ დროის განმავლობაში მეწარმეს კერძო საგადასახადო ინსპექტორი აღარ დააჯარიმებს.
საგადასახადო კოდექსში, რომელიც პარლამენტმა გუშინ მიიღო, კიდევ ერთი ცვლილება შევიდა. შემცირდა ჯარიმების ოდენობა. აქამდე მეწარმე, სალარო აპარატის გამოუყენებლობის შემთხვევაში, პირველ ჯერზე ჯარიმდებოდა 500 ლარით, განმეორების დროს კი ჯარიმების რაოდენობა იზრდებოდა. ამიერიდან, ჯარიმა ყოველ მორიგ შემთხვევაზეც 500 ლარი იქნება. ჯარიმები შემცირდა სალარო აპარატის უქონლობის შემთხვევაშიც.
უბნის საგადასახადო ოფიცრის ინსტიტუტი სამი თვის წინ ამოქმედდა. საგადასახადო ოფიცრის მთავარი მოვალეობა გადამხდელების დახმარება და პრობლემების მოგვარების კუთხით, კონსულტაციის გაწევაა.
საგადასახადო ოფიცრები უბნების მიხედვით არიან გადანაწილებული. ისინი ყოველდღიურად ფეხით ან საჯარო ტრანსპორტით შემოივლიან უბანს, ხვდებიან გადამხდელებს და საჭირო დახმარებას უწევენ. კონსულტირების პარალელურად, უბნის საგადასახადო ოფიცრები მეწარმეებს შემოსავლების სამსახურში მიმდინარე რეფორმებსა თუ სიახლეებსაც აცნობენ.
გადამხდელს შეეძლება ნებისმიერი საკითხის განიხილვა საგადასახადო ოფიცერთან, უზუსტობის აღმოჩენის შემთხვევაში კი ამას არ მოყვება საგადასახადო შემოწმება.
შემოსავლების სამსახურმა გადაამზადა თანამშრომლები, რადგან მნიშვნელოვანია გადამხდელებთან სწორი ფორმით ურთიერთობა. უბნის საგადასახადო ოფიცრებს გავლილი აქვთ შესაბამისი ტრეინინგები და შეძლებენ მეწარმეებს მათთვის საინტერესო ყველა კითხვაზე პასუხი გასცენ.
უბნის საგადასახადო ოფიცრის ინსტიტუტის მთავარი მიზანი გადამხდელთათვის მარტივი, მოსახერხებელი და კომფორტული გარემოს უზრუნველყოფაა.
