საქართველო ქუთაისის აეროპორტის აღდგენისას სომეხი ინჟინრებისა და მშენებლების გამოცდილებას გაიზიარებს. ამის შესახებ საქართველოს ეკონომიკისა და მდგრადი განვითარების მინისტრმა ვერამ ქობალიამ განაცხადა.
ერევანში მყოფმა ქობალიამ, სომეხ კოლეგას ზვარტნოცის აეროპორტის მეორე ტერმინალის გახსნა მიულოცა და აღნიშნა, რომ ის ბრწყინვალეა თავისი დიზაინითა და ტექნიკური აღჭურვილობით. მისი თქმით, ერევნის აეროპორტი მსოფლიოში ერთ-ერთი ულამაზესი აეროპორტია და სომეხი სპეციალისტების გამოცდილება საქართველოსთვის შესაძლოა სასარგებლო აღმოჩნდეს.
"ჩვენ ვგეგმავთ ქუთაისის აეროპორტის აღდგენას და სრულიად შესაძლებელია, რომ მივმართოთ სომეხ კოლეგებს ამ საქმეში თანამშრომლობისთვის. თანამშრომლობის ასეთ პერსპექტივას უახლოეს პერიოდში განვიხილავთ, როდესაც სომხეთის დელეგაცია საქართველოში ჩამოვა", - განაცხადა მინისტრმა.
აღსანიშნავია, რომ 17-18 ნოემბერს თბილისში საქართველო-სომხეთის მთავრობათაშორისი ეკონომიკური კომისიის სხდომა გაიმართება.
შეგახსენებთ, რომ საქართველოს მთავრობა კოპიტნარის აეროპორტის გასხვისებას გეგმავდა, თუმცა საბოლოოდ მისი გასხვისება გადაიფიქრა.
როგორც ცნობილია ქუთაისის აეროპორტის საერთაშორისო სტანდარტებთან შესაბამისობაში მოსაყვანად და ნებისმიერი ევროპული დაბალბიუჯეტიანი კომპანიის მომსახურებისთვის, ეკონომიკისა და მდგრადი განვითარების სამინისტრო შპს "ქუთაისის აეროპორტის" აქტივების სიმბოლურ ფასად - 1 ლარად გასხვისებას აპირებდა. ინტერესის გამოხატვა არ ატარებდა ტენდერის ან აუქციონის სახეს, შესაბამისად, მთავრობას ჰქონდა უფლება, არ მიეღო არც ერთი განაცხადი. საქართველო მთავრობა თანახმა იყო ყოფილიყო პროექტის თანადამფინანსებელიც.
"ქუთაისის აეროპორტი" სახელმწიფო საკუთრებაში არსებული საწარმოა, რომელიც ქუთაისიდან 20 კილომეტრის დაშორებით მდებარეობს. იგი მოიცავს 35,5 ჰექტარ მიწის ნაკვეთს და 2 300 კვ.მ. შენობის ფართს. აეროპორტის ამჟამინდელი გადაზიდვის ტევადობა საათში 200 მგზავრს შეადგენს. აეროპორტი, ყოველგვარი სეზონური შეფერხების გარეშე, 24 საათის განმავლობაში ფუნქციონირებს.