"გუდვილი" და "ჯი.მარტი" ბაზარზე ოპერირებას ერთი სახელით, "გუდვილით" გააგრძელებენ, ამის შესახებ გადაწყვეტილება ორივე კომპანიის მენეჯმენტმა საერთო ინტერესებიდან გამომდინარე მიიღო.
იურიდიული რეკვიზიტები ორივე კომპანიას შპს "ჯი.მარტის" ექნება, ხოლო ბრენდის სახელად "გუდვილი" შენარჩუნდება.
"გუდვილ-ჯი.მარტის გაერთიანება გაძლიერებას ნიშნავს. "ჯი.მარტის" შექმნის დღიდან ჩვენ ვაცხადებდით, რომ პარტნიორები ვართ და ძლიერ კონკურენციას ადგილი არ ექნებოდა. წელიწადნახევარია რაც "ჯი.მარტი" შეიქმნა და ამ ხნის მანძილზე სრულიად შეცვალა იმ უბნის მაცხოვრებელთა შესყიდვების კულტურა. მანამდე არსებული მოუწესრიგებელი ბაზრობა მთლიანად ჩანაცვლდა ჯი.მარტის შეთავაზებით. ამასთან, შეიქმნა პრეცედენტი, რომ დაბალშემოსავლიანმა ოჯახებმაც შეძლეს კომფორტულად შესყიდვების განხორციელება. ჯი.მარტს ძლიერი მენეჯერთა გუნდი ჰყავს, ისინი სწორად ხედავენ ბიზნესის განვითარების პერსპექტივას. ამ გაერთიანებით ჩვენ ვემზადებით მომავალი კონკურენციისთვის, რომელიც საცალო ბაზარზე შეიძლება წარმოიშვას.Eეს არის საერთო მიზანი რომელიც ყველა რესურსის ოპტიმიზაციას ემსახურება. გაძლიერდა ადამიანური, საწარმოო, ტექნოლოგიური რესურსები. დარწმუნებული ვარ, ორივე მხარემ სწორი გადაწყვეტილება მივიღეთ და ამ გაერთიანებით უპირველეს ყოვლისა მომხმარებელი იხეირებს. საფასო პოლიტიკა კიდევ უფრო ლიბერალური გახდება. გაერთიანდება დაგროვებითი ბარათის სისტემაც და მომხმარებელი ერთი საერთო ბარათით ისარგებლებს. ჯი.მარტში დაგროვილი ქულები კი რა თქმა უნდა შეუნარჩუნდებათ. გაფართოვდება "გუდვილის" ქსელიც. დეკემბერში მომხმარებელს კიდევ ერთ ჰიპერმარკეტს შევთავაზებთ, რომელიც ქავთარაძის ქუჩაზე მდებარეობს. პარალელურად ჩვენი გუნდი ახალ ბრენდსაც ამკვიდრებს, რომლის შესახებ დეტალურ ინფორმაციას უკვე წლის ბოლოს გაგაცნობთ", - განაცხადა "გუდვილის გენერალურმა დირექტორმა მიხეილ ჩარკვიანმა.